پرەمەر-ءمينيستردىڭ ورىنباسارى سەرىك جۇمانعارين ءماجىلىس كۋلۋارىندا جۋرناليستەردىڭ "رەسەيگە سالىنعان سوڭعى سانكتسيالار قازاقستاننىڭ استىق ەكسپورتىنا كەرى اسەر ەتە مە؟" دەگەن سۇراعىنا جاۋاپ بەردى. جۇمانعارين سانكتسيانىڭ سالقىنى كوبىرەك سەزىلە باستاعانىن جاسىرمادى، دەپ حابارلايدى “ادىرنا” ۇلتتىق پورتالى Ulysmedia.kz سايتىنا سىلتەپ.
”شىن مانىندە بۇل بىزگە قاتتىراق ءتيىپ جاتىر. مۇنىڭ كەسىرىنەن كوپتەگەن لوگيستيكالىق، ساۋدا تىزبەكتەرى ءۇزىلىپ قالدى. بىز سانكتسيا سالۋشى كواليتسيانىڭ مۇشەسى ەمەسپىز جانە وسى بىرجاقتى سانكتسيالىق ساياساتتى قولدامايمىز. بىراق ول سانكتسيانى ساقتايمىز. ويتكەنى ول بىزگە ەكونوميكالىق تۇرعىدان ءتيىمدى. ءبىزدىڭ ەكونوميكامىز سونشالىق ۇلكەن ەمەس. سايكەسىنشە سانكتسيا تۇسسە، قىسىمىن كوتەرە المايمىز. ءبىزدىڭ كاسىپورىندار ءبىرىنشى كەزەكتە كوتەرە المايدى”، – دەپ جاۋاپ بەردى جۇمانعارين.
ونىڭ سوزىنشە، قازاقستان تاراپى “ۇنەمى ديالوگ قۇرىپ كەلگىسى كەلەدى”.
”اقش-پەن، ەۋروپالىق وداقپەن جۇمىس ىستەيتىن وكىلدىكتەر بار. مەن وسى جۇمىستى قازاقستاننىڭ ىشىندە ۆيتسە-پرەمەر رەتىندە باسقارامىن”، - دەدى ول.
ۆيتسە-پرەمەر رەسەي استىعىنا قويىلعان شەكتەۋلەردىڭ قازاقستانعا اسەرى زەردەلەنىپ جاتقانىن ايتادى.
”سانكتسيا ساياساتى اسەر ەتەتىن سالالار سوڭعى قابىلدانعان پاكەتتەردە كورىنىس تاپقان. ايتارلىقتاي الۋان ءتۇرلى دەۋگە بولادى. ازىرگە ول سانكتسيالار ناقتى ازىق-تۇلىك ونىمدەرىن قامتىعان جوق. بىراق ەۋرووداق رەسەي مەن بەلارۋس بيدايىنا ەكسپورت باجىن سالعانىن بىلەسىزدەر. بۇل ايتارلىقتاي سالماقتى ارگۋمەنت. ياعني، وسى شەكتەۋلەر قانداي دا ءبىر جولمەن ءبىزدى دە جاناپ كەتپەي مە، سونى انىقتاپ الۋ قاجەت. ويتكەنى ءبىز ەۋرووداققا ايتارلىقتاي كوپ بيداي ەكسپورتتايمىز»، - دەدى سەرىك جۇمانعارين.
