پاۆلودار قالاسىنداعى اقپاراتتىق تەحنولوگيالار كوللەدجىنىڭ 3-كۋرس ستۋدەنتى دانيل بارت Google كومپانياسىنان بەرليندە وتەتىن حالىقارالىق Google I/O – 2025 كونفەرەنتسياسىنا ارنايى شاقىرتۋ الدى، دەپ حابارلايدى "ادىرنا" ۇلتتىق پورتالى.
بۇل تۋرالى وقۋ-اعارتۋ مينيسترلىگىنىڭ ءباسپاسوز قىزمەتى حابارلادى.
اتالعان ءىس-شارا ەۋروپا، ازيا، تاياۋ شىعىس پەن افريكا ەلدەرىنىڭ ۇزدىك ماماندارىن بىرىكتىرەتىن اۋقىمدى تەحنولوگيالىق الاڭ بولىپ تابىلادى. كونفەرەنتسيا جاساندى ينتەللەكت، Android, بۇلتتى پلاتفورمالار مەن ۆەب-تەحنولوگيالار سالاسىنداعى ەڭ وزەكتى ءبىلىم مەن تاجىريبە الماسۋعا مۇمكىندىك بەرەدى.
«وسىنداي دەڭگەيدەگى شاراعا ەلىمنىڭ اتىنان قاتىساتىنىما وتە قۋانىشتىمىن. بۇل مەن ءۇشىن ۇلكەن جاۋاپكەرشىلىك ءارى شابىت»، – دەدى دانيل بارت.Google كومپانياسى تاراپىنان شاقىرتۋ العان ساناۋلى ستۋدەنتتەردىڭ ءبىرى رەتىندە دانيل الەم بويىنشا تەحنيكالىق قۇزىرەتتىلىكتى راستاۋدىڭ قاتاڭ تالاپتارىنان ءساتتى ءوتتى. ونىڭ Google-پەن سەرىكتەستىگى 2023 جىلى كوللەدجدىڭ 1-كۋرسىندا وقىپ جۇرگەن كەزىندە باستالعان. سول كەزدە ول قازاقستاندا Google ۇيىمداستىرعان تەحنيكالىق ءىس-شارالار مەن بايقاۋلاردى وتكىزەتىن كوماندا قۇرامىنا ەنگەن. باعدارلامالاۋعا قىزىعۋشىلىعى مەكتەپ جاسىندا ويانعان دانيل كەيىن كوللەدج قابىرعاسىندا ءتۇرلى IT-بايقاۋلار مەن حاكاتوندارعا بەلسەندى قاتىسىپ، بىرقاتار جەتىستىككە جەتتى. 2023 جىلى WorldSkills Kazakhstan بايقاۋىندا التىن مەدال يەلەنىپ، 2024 جىلى يراندا وتكەن حالىقارالىق تۋرنيردە ۇزدىك وندىقتىڭ قاتارىنان كورىندى.
ۇقساس جاڭالىقتار
