اباي وبلىسىندا مىڭعا جۋىق قۇرىلتايشىسى بار “ك-دورستروي” كومپانياسىنا تيەسىلى اسفالت زاۋىتى اۋكتسيونعا شىعارىلدى، دەپ حابارلايدى "ادىرنا" ۇلتتىق پورتالى،
قارجى مينيسترلىگى مەملەكەتتىك كىرىستەر كوميتەتىنىڭ مالىمەتىنشە، مۇلىك كومپانيانىڭ سالىق بەرەشەگىن وتەۋ ءۇشىن ساتىلماق.
اۋكتسيونعا اياگوز قالاسىندا ورنالاسقان ستاتسيونارلىق، تسيكلدىك E-mak Express 204 FUM اسفالت زاۋىتى قويىلدى. 2025 جىلعى 28 قاراشادا جاسالعان باعالاۋ ەسەبىنە سايكەس، مۇلىكتىڭ نارىقتىق قۇنى 245,5 ميلليون تەڭگەنى قۇرايدى. ساۋدا مەملەكەتتىك “مىندەت” سەرۆيسىندە وتەدى جانە 26 جەلتوقسان كۇنى ساعات 11:00-دە باستالادى. باستاپقى (ەڭ تومەنگى) ساتۋ باعاسى 159,6 ميلليون تەڭگە، كەپىلدىك جارناسى 36,8 ميلليون تەڭگە دەپ كورسەتىلگەن.
eGov دەرەكتەرىنە سايكەس، “ك-دورستروي” كومپانياسىنىڭ شامامەن مىڭعا جۋىق قۇرىلتايشىسى بار. بىراق ولاردىڭ ەسىمدەرى جاريالانبايدى. كومپانيا 1993 جىلى تىركەلگەن. Kompra سەرۆيسىنىڭ مالىمەتىنشە، قۇرىلعان ساتىنەن باستاپ 2019 جىلعا دەيىن رەسمي تۇردە كورسەتىلگەن قۇرىلتايشىلارى بولماعان.
DFO پورتالىندا جاريالانعان 2022 جىلعى قارجىلىق ەسەپكە سايكەس، “ك-دورستروي” اكتسيالارىنىڭ 95%-ى “تسەلينترانسستروي” كومپانياسىنا تيەسىلى. Kompra مالىمەتىنشە، بۇل كومپانيانىڭ يەلەرى — سابيت قاناتوۆ پەن تاحيپ يسكانداروۆ. سابيت قاناتوۆ 2000 جىلداردىڭ باسىندا مەملەكەتتىك كىرىستەر ۆيتسە-ءمينيسترى ءارى سالىق كوميتەتىنىڭ توراعاسى بولعان. 2008 جىلى باق ونىڭ ءىرى كولەمدە سالىق تولەۋدەن جالتارعانى ءۇشىن سوتتالىپ، كەيىن راقىمشىلىققا ىلىككەنىن حابارلاعان.
كومپانيانىڭ 2022 جىلعى شىعىنى 2,77 ميلليارد تەڭگەنى قۇراعان. سونداي-اق 2024 جىلدىڭ جازىندا باس اسكەري پروكۋراتۋرا مەملەكەتكە كەلتىرىلگەن زالالدىڭ 1 ميلليارد تەڭگەگە جۋىق بولىگى وتەلگەنىن مالىمدەگەن. سوت قورعانىس مينيسترلىگىنىڭ تالاپ-ارىزىن قاناعاتتاندىرىپ، كومپانيادان 1 ميلليارد 36 ميلليون تەڭگە اۆانس پەن 31 ميلليون تەڭگە ءوسىمپۇل ءوندىرۋ تۋرالى شەشىم شىعارعان.
