الماتى قالاسىنداعى نازارباەۆ زياتكەرلىك مەكتەبىنىڭ 11 سىنىپ وقۋشىسى وقۋدان شىعارىلدى. بۇعان ءبىلىم الۋشىنىڭ مۇعالىمدى بالاعاتتاۋى سەبەپ بولعان، دەپ حابارلايدى «ادىرنا» ءتىلشىسى.
نزم باسقارما توراعاسى ءانۋار جانعوزيننىڭ ايتۋىنشا، وقۋشى وتكەن اپتادا توقساندىق قورىتىندى باقىلاۋ كەزىندە اكادەميالىق ادالدىق ەرەجەسىن بۇزىپ، ۇيالى تەلەفون قولدانعان.
«بەلگىلەنگەن ەرەجەلەرگە سايكەس، ەمتيحان كەزىندە كەز كەلگەن كومەكشى قۇرالداردى قولدانۋعا قاتاڭ تىيىم سالىنعان. بۇل تۋرالى ءبىز ۇنەمى وقۋشىلار مەن اتا-انالارعا حابارلاپ وتىرامىز. اتالعان ەرەجەنى بۇزعانى ءۇشىن مەكتەپ مۇعالىمى بەلگىلەنگەن تارتىپپەن وقۋشىنىڭ تەلەفونىن الىپ قويدى. الايدا ءبىلىم الۋشى اگرەسسيا تانىتىپ، مۇعالىمگە دورەكى ءارى بەيادەپ ءسوز ايتتى. سونىڭ ىشىندە «ش...ۆا» دەگەن ءسوز قولدانىلعان. بۇل جاعداي باسقا وقۋشىلاردىڭ كوزىنشە بولعان، دالەلدەر بار»،—دەدى جانعوزين.
سونداي-اق ول وقۋشىنىڭ بۇرىن دا ءتارتىپ بۇزعانىن اتاپ ءوتتى.
«ءبىز بۇل ءىستى تەكسەرىپ، ءتيىستى قورىتىندى شىعارامىز. الايدا بولعان وقيعاعا تەك مەكتەپتى كىنالاۋ دۇرىس ەمەس، وتباسى مەن قوعامنىڭ جاۋاپكەرشىلىگى بار، ونى ۇمىتپاۋىمىز كەرەك. وسىعان بايلانىستى مەكتەپتىڭ پەداگوگيكالىق كەڭەسىنىڭ بۇل وقۋشىنى وقۋدان شىعارۋ تۋرالى شەشىمى، مەنىڭ ويىمشا، قيسىندى جانە ورىندى»،—دەپ قورىتىندىلادى نزم باسقارما توراعاسى.
قازىر وقۋشىنى باسقا مەكتەپكە اۋىستىرۋ ماسەلەسى شەشىلگەن.
