رەسەي مەن ۋكراينا «1000-عا 1000» فورماتى اياسىندا تۇتقىن الماسۋدى اياقتادى، دەپ حابارلايدى «ادىرنا» ءتىلشىسى.
تۇتقىن الماسۋ پروتسەسى ءۇش كۇنگە سوزىلدى. رەسەي قورعانىس مينيسترلىگىنىڭ مالىمەتىنشە، 25 مامىردا قوس تاراپ 303 ادامنان الماسقان.
«قازىرگى تاڭدا رەسەيلىك اسكەري قىزمەتكەرلەر بەلارۋس رەسپۋبليكاسىنىڭ اۋماعىنا ورنالاستى. ولارعا قاجەتتى پسيحولوگيالىق جانە مەديتسينالىق كومەك كورسەتىلىپ جاتىر»،—دەلىنگەن حابارلامادا.
رەسمي مالىمدەمەگە سۇيەنسەك، الماسۋدىڭ كەلەسى كەزەڭدەرى جوسپارلانباعان.
«16 مامىردا ىستامبۇلدا قول جەتكىزىلگەن رەسەي-ۋكراين كەلىسىمدەرىنە سايكەس، 23 پەن 25 مامىر ارالىعىندا تاراپتار «1000-عا 1000» فورمۋلاسى بويىنشا الماسۋدى جۇزەگە اسىردى»،– دەپ تولىقتىردى مينيسترلىك.
ال ۋكراينا پرەزيدەنتى ۆلاديمير زەلەنسكي تۇتقىن الماسۋ ستامبۇلدا وتكەن 90 مينۋتتىق كەزدەسۋدىڭ جالعىز قورىتىندىسى بولعانىن اتاپ ءوتتى.
