قاراعاندىدا قارت ادام سوققىعا جىعىلىپ، ورتاشا اۋىر جاراقات الدى. جابىرلەنۋشىنىڭ تۋىستارى وقيعانىڭ جان-جاقتى تەرگەلىپ، قوعامعا اشىق جاريالانۋىن تالاپ ەتىپ وتىر. بۇل تۋرالى «ۆەچەرنيايا كاراگاندا» باسىلىمى جازدى، دەپ حابارلايدى “ادىرنا”.
جابىرلەنۋشىنىڭ قىزىنىڭ ايتۋىنشا، جىگىت ءوزىنىڭ ازاماتتىق نەكەدەگى جۇبايىمەن جانە ەكى جاس جىگىتپەن بىرگە اكەسىنىڭ فيرماسى ورنالاسقان اۋماققا كەلىپ، جانجال شىعارعان. كەيىننەن ول زەينەتكەرگە شابۋىل جاساعان.
«ول اكەمنىڭ ەكى قابىرعاسىن سىندىرىپ، باسىنان ۇرعان. جابىرلەنۋشىگە مي شايقالۋ دياگنوزى قويىلدى. ال قالعاندارى زەينەتكەردى سوققىعا جىعىپ جاتقانىن قاراپ تۇرىپ، بولعان جايتتى تەلەفوندارىنا تۇسىرگەن»، – دەدى قاراعاندىلىق تۇرعىن.
قىزىنىڭ سوزىنشە، وقيعادان كەيىن زەينەتكەر وعان قوڭىراۋ شالعاننان كەيىن دەرەۋ جەتكەن.
«ايتا كەتۋ كەرەك، شابۋىل جاساعاندار ماس بولعان. اكەم كومەك سۇراپ قوڭىراۋ شالعان سوڭ وقيعا ورنىنا جەتتىم، سول جەردە ولار ماعان دا تاپ بەرىپ، قۇلاعىمداعى سىرعانى جۇلىپ الدى»، – دەدى قىز.
قاراعاندى وبلىستىق پوليتسيا دەپارتامەنتىنىڭ مالىمەتىنشە، وقيعاعا قاتىسى بار كۇدىكتىنىڭ ءبارى ۇستالىپ، پوليتسيا بولىمىنە جەتكىزىلگەن.
«اتالعان فاكتى بويىنشا قىلمىستىق ءىس قوزعالدى. جان-جاقتى ءارى مۇقيات تەرگەۋ جۇرگىزىلىپ جاتىر. قىلمىستىق ءىستىڭ تەرگەلۋى قاراعاندى وبلىستىق پوليتسيا دەپارتامەنتى باسشىلىعىنىڭ ەرەكشە باقىلاۋىندا»، – دەپ مالىمدەدى پوليتسيا.
