بەلگىلى رەجيسسەر ەرمەك تۇرسىنوۆ الەۋمەتتىك جەلىدە قازاقستاننان كەتكەنىن جازدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، ول ءوز ەركىمەن ەلدەن كەتۋگە ءماجبۇر بولعان، سەبەبى قىسىم كۇشەيىپ، بوستاندىعىنا قاۋىپ تونگەن.
«پروديۋسەرىمە قاتىستى قىلمىستىق ءىس قوزعالعانى وتكەن شاقتى ەسكە تۇسىرۋگە ءماجبۇر ەتتى. ءبىر سوزبەن ايتقاندا، مەن مۇنىڭ ءبارىن بۇرىن دا باستان وتكەردىم. قازىر سناريادتار ماعان بارعان سايىن جاقىنداي تۇسۋدە. سوندىقتان بىرجاقتى بيلەت ساتىپ الۋىما تۋرا كەلدى»، – دەپ جازدى تۇرسىنوۆ.
ول پروديۋسەرى قانات تورەبايدى تەرگەۋگە شاقىرعانىن، بىراق ناقتى قانداي سەبەپپەن ەكەنىن اشىپ ايتپادى.
«مەنى ءبىر اقىماق داۋ-دامايلارعا ارالاستىرعىسى كەلەدى. اقتالۋعا، تۇسىندىرۋگە ماجبۇرلەيدى. ال مەن وندايدى قالامايمىن»، – دەپ مالىمدەدى رەجيسسەر.
ەرمەك تۇرسىنوۆ قاي ەلگە كەتكەنىن ناقتىلاماعانىمەن، «الىستا ءجۇرمىن» دەپ قىسقا عانا جازدى.
«بىلەسىزدەر مە، بۇل ارينە، قايعىلى جاعداي. بىراق مەن باسقا جول كورىپ تۇرعان جوقپىن. مەنى بۇل ەلدەن جاي عانا قۋىپ شىعاردى»، – دەدى ول.
63 جاستاعى ەرمەك تۇرسىنوۆ – جۋرناليست، ستسەناريست، جازۋشى جانە كينورەجيسسەر. ونىڭ فيلمدەرى ەكى رەت قازاقستان اتىنان «وسكار» سىيلىعىنا ۇسىنىلعان. 2010 جىلداردىڭ سوڭىندا قازاقستان كينەماتوگرافيستەر وداعىن باسقاردى. 2019–2021 جىلدارى پرەزيدەنت قاسىم-جومارت توقاەۆتىڭ باستاماسىمەن قۇرىلعان ۇلتتىق قوعامدىق سەنىم كەڭەسىنىڭ مۇشەسى بولعان.
