كاسىپكەر تيمۋر تۋرلوۆ از ۋاقىت ىشىندە ءوز بايلىعىن 5,8 ميلليارد دوللاردان 7,2 ميلليارد دوللارعا دەيىن ۇلعايتتى، دەپ حابارلايدى "ادىرنا" ۇلتتىق پورتالى Forbes جۋرنالىنا سىلتەپ.
2024 جىلعى 8 مامىردا جاريالانعان تىزىمدە تۋرلوۆ 5,8 ميلليارد دوللارلىق كاپيتالىمەن ەكىنشى ورىندا بولعان. ءبىرىنشى ورىندى 7,1 ميلليارد دوللارمەن ۆياچەسلاۆ كيم يەلەنگەن ەدى. الايدا، 15 مامىرداعى مالىمەتكە سايكەس، تيمۋر تۋرلوۆتىڭ بايلىعى 7,2 ميلليارد دوللارعا جەتىپ، ول قازاقستانداعى ەڭ باي ادامعا اينالدى.
ءۇشىنشى ورىندا – ۆلاديمير كيم (5,7 ملرد دوللار), ال دينارا مەن تيمۋر قۇلىباەۆتاردىڭ ارقايسىسىنىڭ بايلىعى 5,5 ميلليارد دوللاردى قۇرايدى.
باق-تا تاراعان اقپاراتقا سايكەس، تيمۋر تۋرلوۆ 2010 جىلدارى وتباسىمەن بىرگە قازاقستانعا قونىس اۋدارعان. قازىر الماتى قالاسىندا تۇرىپ جاتىر.
ول 2022 جىلى رەسەي مەن كاريب تەڭىزى ماڭىنداعى سەنت-كيتس جانە نەۆيس مەملەكەتىنىڭ تولقۇجاتىنەن باس تارتىپ، قازاقستان ازاماتتىعىن العان.
سونىمەن قاتار، تيمۋر تۋرلوۆ الەمدىك ميللياردەرلەر رەيتينگىندە 463-ورىنعا جايعاسقان.
تۋرلوۆ باسشىلىق ەتەتىن Freedom Holding اكتسيالارىنىڭ قۇنىنىڭ وسكەن. 14 مامىردا كومپانيانىڭ نارىقتىق قۇنى نيۋ-يورك قور بيرجاسىندا 10 ميلليارد دوللارعا جەتسە، 15 مامىردا بۇل كورسەتكىش 10,27 ميلليارد دوللاردان استى. تيمۋر تۋرلوۆ حولدينگتىڭ 69,52% اكتسياسىنا يە.
ايتا كەتەيىك، وتكەن ايدا Freedom Holding كومپانياسىنا قاتىستى شۋ شىققان. “الاياققا الداندىم” دەگەن زەينەتكەر پرەزيدەنتكە ۇندەۋ جاساپ، Freedom Holding كومپانياسىنىڭ يەسى تيمۋر تۋرلوۆتىڭ ەلىمىزدەگى قىزمەتىنە توسقاۋىل قويۋدى سۇراعانىن حابارلاعان ەدىك.
ۇقساس جاڭالىقتار
