پاۆلودار قالاسىندا اعايىندى ەكى جىگىتتىڭ اراسىندا ورىن العان جانجال قايعىلى جاعدايمەن اياقتالدى، دەپ حابارلايدى "ادىرنا" ۇلتتىق پورتالى.
بۇل تۋرالى پاۆلودار وبلىسى قىلمىستىق ىستەر جونىندەگى مامانداندىرىلعان اۋدانارالىق سوتىنىڭ ءباسپاسوز قىزمەتى حابارلادى.
سوت ماتەريالدارىنا سايكەس، 2023 جىلدىڭ 22 جەلتوقسانىندا قالاداعى تۇرعىن ۇيلەردىڭ بىرىندە اعاسى ىنىسىنە جۇمىسسىز جۇرگەنى ءۇشىن سوگىس ايتىپ، بالاعات سوزدەر قولدانعان. سول ساتتە الكوگولدىك ماس كۇيدە بولعان كىشى ءىنىسى اس ءۇي پىشاعىن الىپ، اعاسىنىڭ سول جاق كەۋدە تۇسىنا ءبىر رەت پىشاق سۇعىپ العان. سوققى جۇرەك تۇسىن زاقىمداپ، جابىرلەنۋشى وقيعا ورنىندا كوز جۇمعان.
ايىپتالۋشى سوتتا ءوز كىناسىن تولىق مويىنداپ، جاساعان ارەكەتىنە وكىنەتىنىن جەتكىزدى. سونىمەن قاتار ونىڭ بۇرىن سوتتى بولماعانى دا ەسكەرىلدى.
ناتيجەسىندە سوت قىلمىستىق كودەكستىڭ 99-بابى 1-بولىگى ("ادام ءولتىرۋ") بويىنشا ايىپتى دەپ تانىپ، وعان 8 جىل مەرزىمگە باس بوستاندىعىنان ايىرۋ جازاسىن تاعايىندادى.
