ەلىمىزدە 21 مامىردان باستاپ جاڭا بيزنەس-يدەيالاردى ىسكە اسىرۋعا گرانتتار الۋ ءۇشىن وتىنىمدەر قابىلداۋ باستالادى، دەپ حابارلايدى «ادىرنا» ءتىلشىسى.
ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، رەسپۋبليكا بويىنشا ءبىرىنشى لەكتە 4500 ادامعا قايتارىمسىز گرانت بەرىلەدى. ونىڭ مولشەرى 400 اەك (1 572 800 تەنگە) قۇرايدى. ءار قاتىسۋشى ونى تەك ءبىر رەت الا الادى.
«گرانت قاراجاتى ءىسىن جاڭا باستاعان كاسىپكەرلەرگە وزدەرىنىڭ بيزنەس-الەۋەتىن اشۋعا، ءوندىرىستى جولعا قويۋعا جانە دامىتۋعا، سول ارقىلى ءوزىن تۇراقتى تابىسپەن قامتاماسىز ەتۋگە مۇمكىندىك بەرەدى»،— دەلىنگەن حابارلامادا.
ءوتىنىم بەرۋ ءتارتىبى:
- پورتالدا تىركەلۋ; - گرانت الۋ شارتتارىنا سايكەستىگىنە تەكسەرۋدەن ءوتۋ; - بيزنەس-جوسپار ۇلگىسىن جۇكتەپ الىپ، ونى تولتىرۋ جانە پورتالعا ەنگىزۋ; - ءوتىنىش نىسانىن تولتىرۋ جانە ەتسق كىلتىمەن قول قويۋ.ينتەرنەتكە نەمەسە كومپيۋتەرگە قولجەتىمدىلىك بولماعان جاعدايدا، مانساپ ورتالىقتارىنىڭ وزىنە-ءوزى قىزمەت كورسەتۋ ايماقتارىندا، حالىققا قىزمەت كورسەتۋ ورتالىقتارىندا ءوتىنىم بەرۋگە بولادى.
