بۇگىن، 8 مامىر كۇنى گەرمانيادا ەۋروپاداعى ەكىنشى دۇنيەجۇزىلىك سوعىستىڭ اياقتالعانىنا 80 جىل تولۋىنا جانە گەرمانيانىڭ ۇلتتىق سوتسياليزمنەن ازات ەتىلۋىنە ارنالعان رەسمي ەسكە الۋ شارالارى ءوتتى، دەپ حابارلايدى «ادىرنا» ءتىلشىسى DW-گە سىلتەمە جاساپ.
تاڭەرتەڭ بەس كونستيتۋتسيالىق بيلىكتىڭ باسشىسى بەرليندە ورنالاسقان كايزەر ۆيلگەلم مەموريالدىق شىركەۋىندە عيبادات ەتتى. ءراسىم اياقتالعاننان كەيىن فەدەرالدى پرەزيدەنت فرانك-ۆالتەر شتاينمايەر، گەرمانيانىڭ جاڭا كانتسلەرى فريدريح مەرتس، بۋندەستاگ توراعاسى دجۋليا كلەكنەر، بۋندەسرات توراعاسى انكە رەلينگەر جانە فەدەرالدىق كونستيتۋتسيالىق كەڭەستىڭ توراعاسى شتەفان حاربارت گەرمانياداعى سوعىس جانە تيرانيا قۇرباندارىنا ارنالعان باس مەموريال — «نويە ۆاحەگە» گۇل شوقتارىن قويدى.
بەرلين ۋاقىتىمەن 12:30-دا (استانا ۋاقىتىمەن 15:30 — رەد.) بۋندەستاگتا «ەسكە الۋ ساعاتى» باستالدى. دەپۋتاتتار الدىندا ءسوز سويلەگەن فرانك-ۆالتەر شتاينمايەر انتيگيتلەرلىك كواليتسيا ەلدەرىنە العىسىن ءبىلدىردى.
«بۇگىن، 80 جىل وتسە دە، ءبىز ناتسيستىك رەجيمدى جەڭۋ ءۇشىن بار كۇشىن سالىپ، كوپتەگەن قۇرباندىققا بارعان وداقتاس اسكەرلەر مەن ەۋروپاداعى قارسىلاسۋ قوزعالىستارىنا شىن جۇرەكتەن العىسىمىزدى بىلدىرەمىز. ءبىز مۇنى ەشقاشان ۇمىتپايمىز! امەريكالىقتارعا، بريتاندىقتارعا، فرانتسۋزدارعا جانە ولارمەن بىرگە ناتسيستىك تەررورعا قارسى كۇرەسكەن بارلىق جانعا العىس ايتامىز. سونداي-اق قىزىل ارميانىڭ، ورىستاردىڭ، ۋكراينداردىڭ، بەلورۋستاردىڭ جانە ونىڭ قۇرامىندا سوعىسقانداردىڭ ۇلەسىن مويىندايمىز. بۇل ارميانىڭ كەمىندە 13 ميلليون سولداتى جانە سونشا بەيبىت تۇرعىنى قازا تاپتى»،— دەدى گەرمانيا مەملەكەتىنىڭ باسشىسى.
ايتا كەتەيىك، جەڭىس كۇنىن باتىس ەلدەرى 8 مامىردا، ال تمد ەلدەرى 9 مامىر كۇنى تويلايدى. بۇعان ۋاقىت ايىرماشىلىعى سەبەپ بولعان.
بيىل فرانتسيا ەۋروپاداعى جەڭىس كۇنىنىڭ 80 جىلدىعىن كەڭ كولەمدە اتاپ ءوتۋدى شەشكەن. بۇگىن پاريج بەن نورمانديادا اسكەري پارادتار، اۆياتسيالىق شوۋ جانە پرەزيدەنت ەممانۋەل ماكروننىڭ قاتىسۋىمەن تريۋمفال اركاسىنىڭ جانىندا ماڭگىلىك وتتى جاعۋ ءراسىمى ءوتتى.
