شىمكەنت گۇلگە ورانعان شاھارعا اينالىپ كەلەدى

بىلتىر شىمكەنت قالاسىنىڭ اۋماعىن كوركەيتۋ ماقساتىندا 108 ورىنعا، ياعني ماگيسترالدى كوشەلەردىڭ قيىلىسىنا، اينالما جولدار، جول جيەكتەرىنە 220 741 دانا كوپجىلدىق راۋشان گۇلدەرى ەگىلگەن. ولار بيىلعى مامىر ايىنان باستاپ گۇلدەي باستادى. سونداي-اق 1,3 ملن دانا قىزعالداق 40 مىڭ شارشى مەتر اۋماققا وتىرعىزىلدى. ونىڭ ىشىندە 700 مىڭ دانا قىزعالداق دەمەۋشىلەر ەسەبىنەن ەگىلگەن. قىزعالداقتىڭ گۇلدەۋى اياقتالعاننان كەيىن اتالعان اۋماقتارعا ءارتۇرلى بىرجىلدىق گۇلدەر وتىرعىزىلاتىن بولادى. بيىل ۇزىندىعى 54,2 شاقىرىم بولاتىن 24 ماگيسترالدى كوشەدە جالپى اۋماعى - 400 مىڭ م2 بولاتىن كوگالداندىرۋ، ياعني گازون مەن سۋعارۋ جۇيەسىن جاڭارتۋ جۇمىسى اتقارىلادى. سونداي-اق، «اباي»، «مەتاللۋرگ»، «الاتاۋ» ساياباقتارىندا بالالار ويىن الاڭشاسىن سالۋ جوسپارلانۋدا. بۇل قۇرىلىس جۇمىستارى بەكىتىلگەن كەستەگە سايكەس اتقارىلاتىن بولادى. ا.اسقاروۆ اتىنداعى شىمكەنت مەملەكەتتىك دەندرولوگيالىق ساياباعىندا تاشكەنت قالاسىنىڭ بوتانيكالىق باعىمەن ىنتىماقتاستىق بويىنشا كەلىسىم-شارت ءتۇزىلىپ، اعاش بۇتا تۇقىمدارىن الماستىرۋ ماقساتىندا كوشەت تۇرلەرى 214-تەن 251-گە دەيىن ۇلعايدى. 2025 جىلى 132 اعاش-بۇتا تۇقىم تۇرلەرىن ءوسىرۋ جوسپارلانۋدا. وسىلايشا، دەندرولوگيالىق ساياباقتىڭ گەندىك قورى 383 تۇرگە جەتكىزىلەتىن بولادى. جوسپار - 560 اعاش-بۇتا تۇقىم تۇرلەرگە جەتكىزۋ. ال، قازىرگى كەزدە ساياباقتا 74 مىڭنان استام اعاش بار. ماگيسترالدى كوشەلەر مەن ساياباقتاردى سانيتارلىق تازالاۋ جۇمىستارى بويىنشا قالاداعى جالپى ۇزىندىعى 891 شاقىرىمدى قۇرايتىن 443 ماگيسترالدىق كوشەنى مەملەكەتتىك-جەكەشەلىك ارىپتەستىك اياسىندا 5 مەردىگەر مەكەمە سانيتارلىق تازالاۋ جانە اباتتاندىرۋ جۇمىستارىن تۇراقتى نەگىزدە جۇرگىزۋدە. نەگىزگى كوشەلەردى تازالاۋعا مەردىگەرلەر تاراپىنان 2000 جۇمىسشى جانە 189 ارنايى تەحنيكا جۇمىلدىرىلعان. سونىمەن قاتار قالا اۋماعىنداعى 12 ساياباق، ولار - اباي، الاتاۋ، مەتاللۋرگ، ەتنو، ورتالىق، تاۋەلسىزدىك، ناۋرىز، جەڭىس، ءنۇرسات، قازاقستان-تۇركيا، ساۋلە، شىمسيتي ساياباقتارى مەن 44 گۇلزاردى كۇتىپ ۇستاۋ جۇمىستارى جۇرگىزىلۋدە. مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، 2024 جىلدىڭ ءساۋىر ايىنان باستاپ شىمكەنت قالاسىندا «تازا قازاقستان» ەكولوگيالىق اكتسياسى وتكىزىلىپ كەلەدى. اكتسيا باستالعاننان بەرى 317 مىڭعا جۋىق ادام، 2 301 وندىرىستىك جانە كاسىپكەرلىك، 687 الەۋمەتتىك نىسان قاتىسىپ، 10 145 بىرلىك تەحنيكا جۇمىلدىرىلىپ، 24 مىڭ توننا تۇرمىستىق قالدىق شىعارىلدى. سونىمەن بىرگە بىلتىر 200 مىڭعا جۋىق اعاش كوشەتى وتىرعىزىلدى. سونداي-اق، قالا تۇرعىندارىنىڭ تازالىققا قاتىستى ۇسىنىسى مەن شاعىمىن قابىلدايتىن تەلەگرام جەلىسىندەگى «TazaQazBot» پلاتفورماسى ىسكە قوسىلعاننان باستاپ بۇگىنگە دەيىن جالپى سانى 212 ءوتىنىم كەلىپ تۇسكەن. ونىڭ ىشىندە 164 ءوتىنىم بويىنشا ءتيىستى جۇمىستار تولىق ورىندالىپ، 8 ءوتىنىم بويىنشا جۇمىستار جۇرگىزىلۋدە. جوسپارعا سايكەس، 2025 جىلى قالا اۋماعىندا ەكولوگيالىق احۋالدى جاقسارتۋ ماقساتىندا اۋقىمدى «تازا اۋلا»، «World clean-up day» جانە تاعى دا باسقا كوپتەگەن تازالىق ءىس-شارالارىن وتكىزۋ، 220 مىڭعا جۋىق اعاش كوشەتتەرىن وتىرعىزۋ، 24 كوشەنى كوگالداندىرۋ جۇمىستارى جوسپارلانعان. ودان بولەك، قالا اۋماعىنداعى 50 ەسكەرتكىش پەن 25 نىساندا 40 سۋبۇرقاقتى تازالاۋ، كۇتىپ-ۇستاۋ جۇمىستارى دا جوسپارعا سايكەس اتقارىلماق.