الماتىنىڭ Rixos قوناقۇيىندە قۇرىلعانىنا ءبىر جىل بولعان Assyltas قوعامدىق قورىنىڭ تانىستىرىلىم شاراسى ءوتتى. جيىنعا ماسكەۋ قالاسىنان ارنايى كەلگەن قازاقتان شىققان تۇڭعىش وليمپيادا چەمپيونى ءالجان جارمۇحامەدوۆ، ۇلتتىق وليمپيادا كوميتەتى سپورت ديرەكتسياسىنىڭ باسشىسى ەلسيار قاناعاتوۆ، قازاقستان جازۋشىلار وداعىنىڭ توراعاسى ۇلىقبەك ەسداۋلەت، قازاقستاننىڭ ەڭبەك سىڭىرگەن قايراتكەرى اقىن ءجۇرسىن ەرمان، بەلگىلى سازگەر التىنبەك قورازباەۆ تب ەلىمىزگە تانىمال ازاماتتار قاتىستى.
كوپشىلىك الدىندا Assyltas قوعامدىق قورىنىڭ اتقارىپ جاتقان جۇمىستارى، الداعى جوسپارلارى تۋرالى ايتىلىپ، قوردىڭ قولداۋىمەن جارىق كورگەن "تاريحقا تولى تارباعاتاي الماناحىنىڭ 4-ءشى تومدىعى، اقىندار ايتىسى توپتاستىرىلعان "تۋعان جەرگە تۋىڭدى تىك" كىتابىنىڭ تۇساۋكەسەر راسىمدەرى ءوتتى.
ارتىنشا، Assyltas قورىنىڭ ۇيعارىمىمەن وليمپيادا چەمپيونى ءالجان جارمۇحامەدوۆ، اقىن ءجۇرسىن ەرمان جانە ۇلاعاتتى ۇستاز ورىنشا كارابالينا Assyltas توسبەلگىسىنىڭ يەگەرلەرى اتاندى. سونداي-اق، داڭقتى بالۋان داۋلەت بولاتۇلى تۇرلىحانوۆ، ايتىسكەر اقىن سەرىك قاليەۆ پەن تانىمال جۋرناليست ماقسات تولىقبايعا "تارباعاتاي تارلانى" مەدالدارى بەرىلدى. اتالعان ازاماتتاردىڭ بارلىعىنا Assyltas قوعامدىق قورىنىڭ قۇرىلتايشىسى دۋلات تۇرسىنۇلى تاستەكەەۆ قور اتىنان سىياقى تابىستادى. شارا سوڭىندا رۇستەم قايىرتايۇلى جينالعان قاۋىمعا ارناۋ ايتىپ، كوپشىلىككە داستارحان جايىلدى.
