ءۇندىستان مەن پاكىستان اراسىنداعى قاقتىعىستىڭ ۋشىعۋىنا بايلانىستى ماسكەۋ مەن بەيجىڭ الاڭداۋشىلىق ءبىلدىرىپ، جاعدايدى بەيبىت جولمەن رەتتەۋگە شاقىردى، دەپ حابارلايدى “ادىرنا” ۇلتتىق پورتالى.
كاشميردەگى شيەلەنىستىڭ كۇشەيۋىنە بايلانىستى رەسەي مەن قىتاي باسقا ەلدەرمەن بىرگە نيۋ-دەلي مەن يسلاماباد بيلىگىن سابىر ساقتاۋعا شاقىردى.
رەسەي سىرتقى ىستەر مينيسترلىگىنىڭ رەسمي وكىلى ماريا زاحاروۆا 7 مامىر كۇنى ءۇندىستاننىڭ پاكىستان اۋماعىنا سوققى جاساعانى بەلگىلى بولعان سوڭ: ء“ۇندىستان مەن پاكىستان اراسىنداعى اسكەري قاقتىعىستىڭ ۋشىعۋىنا تەرەڭ الاڭداۋشىلىق بىلدىرەمىز”، – دەدى.
“تاراپتاردى ايماقتاعى جاعدايدىڭ ودان ءارى ناشارلاۋىنا جول بەرمەۋ ءۇشىن سابىر مەن ۇستامدىلىق تانىتۋعا شاقىرامىز. نيۋ-دەلي مەن يسلاماباد اراسىنداعى كەلىسپەۋشىلىكتەر 1972 جىلعى سيملا كەلىسىمى مەن 1999 جىلعى لاحور دەكلاراتسياسىنىڭ اياسىندا، بەيبىت ساياسي-ديپلوماتيالىق جولمەن ەكىجاقتى نەگىزدە شەشىلەدى دەپ ۇمىتتەنەمىز”، – دەپ قوستى ول.
قىتاي شيەلەنىستى ۋشىقتىراتىن ارەكەتتەردەن باس تارتۋعا شاقىردى
قىتاي بيلىگى دە ءۇندىستان مەن پاكىستان اراسىنداعى قاقتىعىستىڭ ۋشىعۋىنا بايلانىستى الاڭداۋشىلىق ءبىلدىردى. قحر سىرتقى ىستەر مينيسترلىگى تاراتقان مالىمدەمەدە:
“قىتاي بۇگىن تاڭەرتەڭ ءۇندىستاننىڭ جاساعان اسكەري ارەكەتتەرىنە وكىنىش بىلدىرەدى جانە قازىرگى وقيعالارعا الاڭداۋلى”، – دەلىنگەن.
بەيجىڭ قىتايدىڭ “تەرروريزمنىڭ بارلىق تۇرلەرىنە قارسى” ەكەنىن اتاپ ءوتتى.
ء“بىز ءۇندىستان مەن پاكىستاندى بەيبىتشىلىك پەن تۇراقتىلىقتى ءبىرىنشى ورىنعا قويىپ، سابىر ساقتاۋعا، شيەلەنىستى ودان سايىن ۋشىقتىراتىن ارەكەتتەردەن اۋلاق بولۋعا شاقىرامىز”، – دەلىنگەن مالىمدەمەدە.
باسقا ماتەريالدار
Adyrna.kz ۇلتتىق پورتالىنىڭ ماڭىزدى اقپاراتتارىنا جازىلۋ
سوڭعى جاڭالىقتار تۋرالى حاباردار بولىڭىز