ۆاشينگتوندا الاشتىڭ اسىل تۇلعاسى، ابىزى، قازاقستاننىڭ حالىق جازۋشىسى مۇحتار ماعاۋيننىڭ جىلدىق اسى ءوتتى. بۇل تۋرالى اقش-تاعى قازاق ازاماتى ساپاربەك ناعاشىبەكوۆ Facebook پاراقشاسىندا جازدى، دەپ حابارلايدى «ادىرنا».
Kazakh American Association وكىلدەرى مۇحتار ماعاۋيننىڭ قابىرىنە زيارات ەتىپ، قۇران باعىشتادى. ودان كەيىن جازۋشىنىڭ ۇلى ەدىگەنىڭ شاڭىراعىنا بارىپ، اسقا قاتىسقان.
«وسى استا مۇحتار اتامىزدى ەسكە الىپ، تاعىلىمدى، ونەگەلى اڭگىمەلەر ايتىلدى. مۇحتار ماعاۋيندى تەك قازاقتار عانا ەمەس، تۇركى-تۇران الەمى، قىرعىزدار، ورىستار، نەمىستەر دە جوعارى باعالاپ، زور قۇرمەتتەيدى ەكەن.
مۇحتار ماعاۋين بۇكىل سانالى عۇمىرىن قازاق حالقىنا ارنادى. ول 27 تومدىق ەڭبەگىن جازىپ، قازاقتىڭ بەس عاسىرلىق تاريحىن رۋحاني تۇرعىدا تۇگەندەپ بەردى. بولاشاق ۇرپاق اتامىزدىڭ ۇلى ەڭبەگىن ءالى تالاي باعالايتىنى ءسوزسىز. قازاقتىڭ تاريحىندا وسىنشاما كىتاپتار جازعان جازۋشى بولماعان.
وسى ەڭبەكتەرى ءۇشىن ءبىز، قازاق حالقى، مۇحتار ماعاۋينگە قارىزدارمىز. قازاقتار اتىنان مۇحتار اتامىزعا جانە ماعاۋيندەر اۋلەتىنە شەكسىز العىسىمدى بىلدىرەمىن.
ۆاشينگتوندا ءبىزدىڭ اسسوتسياتسيا ۇيىمداستىرعان ناۋرىز مەرەكەلەرى مەن ءتۇرلى باسقوسۋلارعا مۇحتار اتامىز ۇنەمى قاتىسىپ، باتاسىن بەرىپ، تاعىلىمدى اڭگىمەلەرىمەن رۋحىمىزدى كوتەرىپ وتىراتىن.
ول — ۆاشينگتونداعى قازاقتاردىڭ اسقار تاۋى ەدى. اتامىزدى ساعىندىق. جاتقان جەرى جارىق، جانى ءجانناتتا بولسىن. مۇحتار ماعاۋين اتامىزدىڭ قابىرىن زيرات ەتەمىز دەگەن اعايىن google كارتا مەن وسى جەرگە بارۋعا بولادى»، دەپ جازدى ساپاربەك ناعاشىبەكوۆ.
مۇحتار ماعاۋين - جازۋشى، ادەبيەت تاريحىن زەرتتەۋشى عالىم، تاريحي رومانداردىڭ اۆتورى.
ول 1940 جىلى 2 اقپاندا سەمەي وبلىسىنىڭ شۇبارتاۋ اۋدانىندا دۇنيەگە كەلگەن. 1962 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن، 1965 جىلى اسپيرانتۋراسىن بىتىرگەن. ءار جىلدارى "قازاق ادەبيەتى" گازەتىندە، "جۇلدىز" جۋرنالىندا، "جازۋشى" باسپاسىندا قىزمەت ىستەگەن. عىلىم اكادەمياسىنا قاراستى مۇحتار اۋەزوۆ اتىنداعى ادەبيەت جانە ونەر ينستيتۋتىندا، ماسكەۋدە ماكسيم گوركي اتىنداعى ادەبيەت ينستيتۋتىندا قازاق فولكلورى مەن قازاق ادەبيەتى تاريحى بويىنشا لەكتسيا وقىعان.
جازۋشى حV-ءحVىىى عاسىرداعى ۇمىتىلعان ەسكىلىكتى قازاق پوەزياسىن قايىرا اشىپ، رەسمي ادەبيەت تاريحىنا ەنگىزگەن. «الاساپىران» تاريحي رومان-ديلوگياسى ءۇشىن قازاق كسر-ءىنىڭ اباي اتىنداعى مەملەكەتتىك سىيلىعى بەرىلگەن.
جازۋشىنىڭ ءXV–XVىىى عاسىرداعى قازاق اقىن، جىراۋلارى تۋرالى "قوبىز سارىنى", "كوك مۇنار" رومانى، "شاقان-شەرى", "گاۋھار" رومان-ديلوگياسى، "جارماق", "شىڭعىس حاننىڭ شاراپاتى" جانە وزگە دە شىعارمالارى بار.
2006 جىلدا مۇحتار ماعاۋين ەلدەن جىراققا كەتىپ، اۋەلى چەحيا قالالارىندا، كەيىن ۆاشينگتوندا تۇردى. بيىل 10 قاڭتاردا 85-كە قاراعان شاعىندا سول ەلدە ومىردەن ءوتتى. جازۋشىنىڭ دەنەسى ءوزىنىڭ وسيەتى بويىنشا ۆاشينگتون ماڭىنداعى پاركلوۋن مەموريالدىق زيراتىنا قويىلدى.
