Baring Vostok قورىنىڭ نەگىزىن قالاۋشى، Kaspi Bank اكتسيونەرى مايكل كالۆيدىڭ رەسەيدەگى بار مۇلكىنە ارەست قويىلدى. بۇعان قوسا امەريكالىق كاسىپكەر ءىسى بويىنشا ايىپتالعان وزگە ازاماتتاردىڭ دا مۇلكىنە ارەست سالىندى. بۇل اقپاراتتى قور وكىلدەرى مەن ينۆەستور زاڭگەرىنە سىلتەمە جاساعان "ينتەرفاكس" اگەنتتىگى حابارلادى.
سوت شەشىمىنە سايكەس، كاسىپكەردىڭ ايەلى مەن بالا-شاعاسى تۇرىپ جاتقان پاتەرلەر دە ارەست قويىلعان. كالۆي ادۆوكاتى سوت شەشىمىن اپەللياتسياعا بەرەتىنىن ايتتى.
52 جاستاعى مايكل كالۆي بيىل اقپان ايىندا قاماۋعا الىنعان. تەرگەۋشىلەر كاسىپكەردى "ۆوستوچنىي" بانكىنەن 2,5 ميلليارد رۋبل ۇرلاۋ ءۇشىن الاياقتىق سحەما قۇردى دەپ ايىپتادى. ىس وسى بانكتىڭ ديرەكتورلار كەڭەسىنىڭ مۇشەسى شەرزود يۋسۋپوۆتىڭ ارىزى بويىنشا قوزعالعان. كالۆي تاعىلعان ايىپتاردى جوققا شىعارىپ، قىلمىستىق ءىستى "بانك اكتسيونەرىمەن اراداعى كورپوراتيۆتى داۋمەن" بايلانىستىرعان. كالۆي ءبىراز ۋاقىت تەرگەۋ يزولياتورىندا وتىردى، كەيىننەن ۇيقاماققا اۋىستىرىلدى.
بۇعان دەيىن قارجى ساراپتاماسى جۇرگىزىلىپ، كالۆي مەن وزگە ايىپتالۋشىلاردىڭ ارەكەتىنەن قىلمىستىق ارەكەت تاپپاعان.
ەسەپ كوميتەتىنىڭ باسشىسى الەكسەي كۋدرين "كالۆيدىڭ قامالۋى ەكونوميكاعا تەرىس اسەر ەتىپ، رەسەيگە كەلەتىن كاپيتالدى ەسەلەپ ازايتتى" دەگەن.
رەسەيدە 25 جىل بۇرىن قۇرىلعان "بەرينگ ۆوستوك" قورى 3,7 ميلليارد دوللاردان استام كاپيتال جيناپ، بىرنەشە ەلدەگى 80-گە جۋىق جوباعا، سونىڭ ىشىندە قازاقستانداعى Kaspi Bank-كە ينۆەستيتسيا سالعان. 2018 جىلعى 1 قازانداعى مالىمەت بويىنشا، "بەرينگ ۆوستوك" قورى قازاقستانداعى Kaspi Bank-ءتىڭ 39,5 پايىز اكتسياسىنا يەلىك ەتەدى. بۇعان دەيىن Kaspi Bank اكتسيونەرلەرىنىڭ ءبىرى ميحايل لومتادزە امەريكالىق كاسىپكەردىڭ قامالۋىنىڭ قازاقستاندىق Kaspi Bank جۇمىسىنا اسەرى جوق دەپ مالىمدەگەن.
"ازاتتىق" راديوسى
