وزبەكستاننىڭ سىرتقى ىستەر مينيسترلىگى رەسەيدە ميگرانتتاردىڭ قۇقىقتارىنىڭ بىرنەشە رەت بۇزىلۋىنا الاڭداۋشىلىق ءبىلدىرىپ، ولاردىڭ ساقتالۋىن قامتاماسىز ەتۋگە شاقىردى، دەپ حابارلايدى "ادىرنا" ۇلتتىق پورتالى.
مينيسترلىكتىڭ سايتىندا جاريالانعان مالىمەتكە سايكەس، وزبەكستان سىرتقى ىستەر ءمينيسترىنىڭ ورىنباسارى بوبۋر ۋسمانوۆ رەسەيدىڭ تاشكەنتتەگى ەلشىسى ولەگ مالگينوۆپەن كەزدەسكەن.
كەلىسسوزدەر بارىسىندا وزبەكستان تارابى رەسەيدەگى وزبەكستاندىق ەڭبەك ميگرانتتارىنا قاتىستى قۇقىقتارىنىڭ بۇزىلۋى مەن دورەكى قاتىناس تۋرالى جيىلەپ كەتكەن حابارلامالارعا رەسەيلىك ديپلوماتتىڭ نازارىن اۋداردى.
"مۇنداي ارەكەتتەر رەسەي اۋماعىندا ەڭبەك ەتىپ جۇرگەن وزبەك ازاماتتارىنىڭ قۇقىقتارى مەن بوستاندىقتارىن بۇزۋ جانە بۇل قۇقىقتار قابىلداۋشى ەلدىڭ زاڭدارىمەن قامتاماسىز ەتىلۋى ءتيىس", – دەلىنگەن ءباسپاسوز حابارلاماسىندا.
وسىعان بايلانىستى مينيسترلىك اتالعان ماسەلەنى مۇقيات زەرتتەۋگە جانە وزبەك تاراپىنىڭ الاڭداۋشىلىعىن رەسەيدىڭ ءتيىستى قۇزىرەتتى ورگاندارىنا جەتكىزۋگە شاقىردى.
"كەزدەسۋ قورىتىندىسىندا ەكى ەل ازاماتتارىنىڭ قۇقىقتارى مەن بوستاندىقتارىن ءوزارا قامتاماسىز ەتۋ بويىنشا تىعىز ىنتىماقتاستىقتى جالعاستىرۋ تۋرالى كەلىسىمگە قول جەتكىزىلدى", – دەپ اتاپ ءوتتى مينيسترلىك.
ايتا كەتەيىك، سىرتقى ساياسات ۆەدومستۆوسى الاڭداۋشىلىق تۋعىزعان وقيعالاردىڭ ەگجەي-تەگجەيىن جاريالاعان جوق.
