فرانتسيانىڭ اسكەري-تەڭىز كۇشتەرى تۋلون قالاسىنىڭ جاعالاۋىندا ەكيپاجسىز سوققى جاسايتىن كاميكادزە كاتەردى سىناقتان وتكىزدى، دەپ حابارلايدى “ادىرنا” ۇلتتىق پورتالى فرانتسيا قارۋلى كۇشتەر مينيسترلىگىنە سىلتەپ.
پاترۋلدىك كەمەدەن جىبەرىلگەن كاتەر جارىلعىش زاتپەن جابدىقتالىپ، ەسكى جۇك كەمەسىنە باعىتتالدى. دروننىڭ سوققىسىنان كەيىن كۇشتى جارىلىس تىركەلگەن.
قارۋلى كۇشتەر ۆەدومستۆوسى مۇنداي سىناقتاردىڭ حالىقارالىق قاۋىپسىزدىك جاعدايىنىڭ ۋشىعۋىنا بايلانىستى قاجەت ەكەنىن اتاپ ءوتتى.
سىناق كەزىندە ەكولوگيالىق جانە تەڭىزشىلەردىڭ قاۋىپسىزدىگى ەسكەرىلىپ، وتىن الدىن الا توگىلگەن. كەمەنىڭ ىشىندە قورعاۋ شارالارى قابىلدانعان. جارىلىس ورنى ارنايى مەتالل پليتالارمەن جانە اۋا باللوندارى ارقىلى قورعالعان.
بۇل — فرانتسۋز فلوتىندا جۇرگىزىلگەن العاشقى تاجىريبە ەمەس. 2024 جىلى جەلتوقساندا اتومدىق سۋاستى قايىعى ەسكى كەمە كورپۋسىن تورپەدامەن جارىپ، سۋعا باتىرعان. 2025 جىلدىڭ اقپانىندا La Fayette تيپىندەگى «كۋربە» فرەگاتى تەڭىز ميناسىمەن سىناقتان ءوتتى. ال ناۋرىزدا Tonnerre تىكۇشاق تاسىمالداۋشى كەمەسى DRAGOON Fury جاتتىعۋلارىن باسقاردى.
Naval News پورتالى بۇل دروننىڭ فرانتسيالىق SeaOwl كومپانياسى جاساعان بولۋى مۇمكىن ەكەنىن جازادى.
ۇقساس جاڭالىقتار
