الماتى اۋەجايىندا ەسىرتكىگە ماس بولعان ۇشقىش ۇستالدى. اقپاراتتى Air Astana اۋەكومپانياسىنىڭ ءباسپاسوز قىزمەتى راستادى، دەپ حابارلايدى “ادىرنا” ۇلتتىق پورتالى.
باق-تا Air Astana اۋەكومپانياسىنىڭ ەكىنشى ۇشقىشى الماتى حالىقارالىق اۋەجايىندا ىشكى رەيستەردى جونەلتۋ ايماعىندا ۇستالعانى تۋرالى اقپارات پايدا بولدى. تەرگەۋشىلەردىڭ مالىمەتىنشە، 31 جاستاعى ەر ادام ەسىرتكى پايدالانىپ، ساقتاعان.
اۋەكومپانيانىڭ ءباسپاسوز قىزمەتى راستاعان اقپارات بويىنشا، 23 ساۋىردە الماتى اۋەجايىندا جولاۋشى رەتىندە ۇشاققا مىنگەن ۇشقىش ەسىرتكىگە ماس كۇيدە ۇستالعان. پوليتسەيلەر سوتالدى تەرگەۋ امالدارىن جۇرگىزىپ جاتىر، ال قىزمەتكەردىڭ ءوزى جۇمىستان شەتتەتىلگەن.
"اۋەكومپانيا قىزمەتكەرلەردىڭ الكوگول نەمەسە ەسىرتكى پايدالانۋىنا توزبەۋشىلىك كورسەتەدى، ويتكەنى ۇشۋ قاۋىپسىزدىگى ءبىزدىڭ باسىمدىعىمىز بولىپ تابىلادى. اۋەكومپانيادا ەكيپاجداردىڭ قانىندا الكوگول نەمەسە ەسىرتكى زاتتارىنىڭ بولۋىنا تۇراقتى نەگىزدە تەستىلەۋ جۇرگىزىلەدى", - دەپ حابارلادى كومپانيانىڭ ءباسپاسوز قىزمەتى.
