ول ەجەلدە ءدىڭى بەرىك، ماۋەلى بيىك بايتەرەكتەي كوككە ۇمسىنعان ۇلتىنىڭ رۋحاني مۇراسىنىڭ جەلگە ۇشقان جاپىراقتاي ابدەن توز-توزى شىققان جۇدەۋ، جاداۋ شاعىندا عىلىمعا كەلدى.
بۇل تۇستا ەرتەدە قايىڭنىڭ بەزىندەي تۋعان حالقىنىڭ بولمىس-بىتىمىمەن بىتە قايناسقان فولكلورلىق مۇراسى وتارلاۋشى ۇلت تاراپىنان بۇتارلانىپ، بۇرمالانىپ، كوبىسى قارا كولەڭكە ارحيۆتەردە شاڭ باسىپ جاتقان-دى. ول ەجەلگى مۇرانى شاڭ-توزاڭنان سىلكىپ ارشي باستادى. بىرتىندەپ قازاقتىڭ حالىق پروزاسىنىڭ نەگىزىن قالادى. ەرتەگى، اڭىز، ميفتەردىڭ بويىنا قان جۇگىرتىپ، جان ءبىتىردى. فولكلوردىڭ تەوريالىق قالپىن تياناقتادى. سويتە ءجۇرىپ جولىن جالعايتىن شاكىرت تاربيەلەدى. سۇڭعىلا ءىزباسارلارىن تىڭ، سونى تاقىرىپتارعا سالدى. ءوزى جەلدىڭ وتىندە تۇرىپ، ولاردىڭ ەڭبەكتەرىن شاشاۋ شىعارتپاي قورعاتتى. ول ۇلتىنىڭ ۇشان-تەڭىز مۇراسىنىڭ باسىن قوسىپ «بابالار ءسوزىنىڭ» 100 تومىن قۇراستىرۋعا ۇيىتقى بولدى. مەحناتتى جۇمىستى ابىرويمەن الىپ شىقتى. ەنشىلى عۇمىرىن تۇتاستاي ۇلت رۋحانياتىنا ارنادى. اقىرى، مىنە، جارىق دۇنيەدەگى ءدام-تۇزى تاۋسىلىپ، يىلمەگەن، بۇگىلمەگەن، تۋا ءبىتتى مىنەزىنەن فانيدەن باقيعا كوشتى. سوڭىنا حاتى ولمەيتىن عالىمنىڭ شىن بەينەسىن قالدىردى. رۋحى پەيىشتە شالقىسىن!
ول كورنەكتى عالىم – سەيىت قاسقاباسوۆ.
كلاسسيكالىق تولقىننىڭ سوڭعى تۇياعى
قازاق ادەبيەت ايدىنىنداعى كلاسسيكالىق ادەبيەتتانۋشىلاردىڭ ەڭ سوڭعى تۇياعى سەيىت قاسقاباسوۆ تا قايتىس بولىپتى. سوناۋ ەرتەدە م.اۋەزوۆ، ج.ايماۋىتوۆتار باستاپ كەتكەن، ب.كەنجەباەۆ، ق.جۇماليەۆتەر نەگىزىن قالاعان كلاسسيكالىق ادەبيەتتانۋدىڭ ەڭ سوڭعى تۇياعى ومىردەن وزدى. وسىمەن قازاق ادەبيەتتانۋىنىڭ ءبىر داۋىرلىك تاريحى ءوزىنىڭ نۇكتەسىن قويدى. ادەبيەت ايدىنىندا كەمەلەر كەتىپ، ءبىز سەكىلدى قايىقتار قالدىق. سەيىتتىڭ بويىنداعى عىلىمي قاسيەت تۋا بىتكەن. ونىڭ ويلاۋ جۇيەسى، جازۋ مانەرى جانە تەوريالىق قاعيداتتاردى رەت-رەتىمەن تالداۋى 1960 جىلداردان باستاپ بۇگىنگى كۇنگە دەيىنگى ەلۋ جىلدىق ادەبيەتتانۋداعى ۇلكەن ءۇردىس بولاتىن. ول كىسى عىلىمي تەرميندەردى ساتى، ساتىسىمەن قويا بىلەتىن. ادەبيەتتانۋ عىلىمىن ەڭ تومەنگى نۇكتەدەن باستاعان ادام سول ساتى ارقىلى بىرتىندەپ جوعارىلاپ وتىرىپ، ونىڭ ەڭ بيىك دەڭگەيىنە كوتەرىلەتىن. ونىڭ جازعانى دا، وقىعان دارىستەرى دە سونداي تياناقتى. سونىمەن قاتار س.قاسقاباسوۆتىڭ قازاق فولكلورىنداعى پروزا، ابايدىڭ شىعارمالارىنداعى پروزالىق ۇلگىلەر، «ەسكەندىر» پوەماسىنىڭ جازىلۋ تاريحى مەن تەكستولوگياسى تۋرالى جازعاندارى ۇلكەن ءۇردىستى شىعارمالار. مىنە، وسىنداي عىلىم قايراتكەرىن اقتىق ساپارعا شىعارىپ تۇرعانىمىز وكىنىشتى. ەندى كىم؟ بۇرىن، ءتىپتى مەنىڭ ءوزىم كەيىنگى جيىرما جىلداعى بارلىق كىتاپتارىمدى س.قاسقاباسوۆقا رەتسەنزياعا بەرمەي جاريالاماۋشى ەدىم. ونىڭ ءار پىكىرى، ءتىپتى تەرىستەگەن كۇننىڭ وزىندە ماعان باسقاشا ءبىر وي سالىپ، عىلىمي باعىت-باعدار سىلتەيتىن. 1987-1989 جىلدارداعى الاش ارىستارىن اقتاۋ كەزىندەگى ءىس-ارەكەت جانە سونداعى جازىلعان انىقتامالاردىڭ بارلىعىن س.قاسقاباسوۆ مارقۇم جازىپ ەدى. مۇنى ءبىز ءوزارا «ەشكىمگە ايتپايمىز» دەپ كەلىسكەن ەدىك. اسىرەسە ورتالىق كوميتەتكە نۇسقاۋشى بولىپ بارعاننان كەيىن، ءو.جانىبەكوۆتىڭ كەڭەسشىسى بولعاننان كەيىن 1988 جىلى 24 ساۋىردە سوت جۇزىندە اقتالعان الاش قايراتكەرلەرىن ءو.جانىبەكوۆ ەكەۋى ىسكە اينالدىردى. كولبيننىڭ الدىنا ماسەلە ەتىپ قويىپ، قاۋلى شىعارۋعا دەيىن جەتكىزدى. ەگەردە سول كەزدە كولبيننىڭ مادەنيەت، ادەبيەت جونىندەگى كەڭەسشىسى س.قاسقاباسوۆ پەن زاڭ جونىندەگى كەڭەسشىسى س.قاسىموۆ بولماعاندا الاش ارداگەرلەرىنىڭ اقتالۋى كەم دەگەندە 1,5-2 جىلعا سوزىلار ەدى. ال بۇل حالىقتى وياتۋداعى، تاۋەلسىزدىك الۋداعى دايىندىققا ۇلكەن نۇقسان كەلتىرەتىن ەدى. سەيىت اسقارۇلى قازاق ادەبيەتى تاريحىنداعى جانە ونىڭ تەوريالىق ۇردىسىندەگى كلاسسيكالىق تولقىننىڭ سوڭعى تۇياعى. ەندى ءبىز كەمەلەر كەتكەندە ارتىندا قالعان قايىقتار قالتىلداپ ءومىر سۇرەمىز، وكىنىشتىسى – وسى. بىراق قاسقاباسوۆ سياقتى عۇلامالار تامىرىن تەرەڭگە جايدىرىپ كەتكەن ادەبيەتتانۋ عىلىمى كوكتەيدى، كوگەرەدى، ەرتەڭگى كۇنگە ءوز ءونىمىن مولىنان قاۋلاتىپ وسىرەدى دەپ ويلايمىن. ادام رەتىندە دە جۇرەگى جىلى، ناقتى سويلەيتىن شىنشىل، شىندىقتىڭ ءوزىن كوڭىلىڭدى قالدىرماي جەتكىزەتىن جان ەدى. جاتقان جەرى جايلى، توپىراعى تورعا، يمانى جولداس بولسىن! كوردەن قيامەت-قايىمعا دەيىنگى كومەسكى ومىردە اللا الدىنان جارىعىن ءتۇسىرسىن!تۇرسىن جۇرتباي
قازاق فولكلورتانۋىن حالىقارالىق دەڭگەيگە كوتەرگەن عالىم
س.قاسقاباسوۆتىڭ قايتىس بولۋى – ورنى تولماس ۇلكەن قازا. سەيىت اعامىز قازاقتىڭ عانا ەمەس، جالپى تۇركى حالىقتارىنىڭ فولكلورىن زەرتتەۋگە ۇلەس قوسقان عالىم. سوڭىنا ۇلكەن مەكتەپ قالدىرعان تۇلعا. سونداي-اق ول كىسى عىلىم ءىسىن ۇيلەستىرگەن، ۇيىمداستىرعان قايراتكەر. قازاقستان تاۋەلسىزدىك العان كەزىندە قازاق عىلىمىن سوۆەت وكىمەتىنەن ءبولىپ، قازاقستاننىڭ تاۋەلسىز عىلىم قورعايتىن كوميتەتىنىڭ نەگىزىن سالعان، العاشقى جوعارى اتتەستاتسيالىق كوميسسيانى باسقارعان كىسى. سونىمەن قاتار قۋعىن-سۇرگىن كورگەن الاش زيالىلارىنىڭ قۇجاتتارىن دايىنداپ، ولاردى اقتاۋ ىسىنە ۇلكەن ۇلەس قوستى. سەيىت اعانى ەڭ اۋەلى ادەبيەتتانۋشى، فولكلورتانۋشى عالىم دەپ ايتامىز. كەزىندە قازاق فولكلورىنىڭ «بابالار ءسوزى» دەپ اتالاتىن ءجۇز تومى جارىق كوردى. مۇنىڭ كوبىسى بۇعان دەيىن ارحيۆ قويمالارىندا شاڭ باسىپ جاتقان، جارىققا جەتكەندەرىنىڭ ءوزى بۇرمالانىپ، جۇلمالانىپ شىعارىلعان. سوۆەت وكىمەتى كەزىندە ءبىزدىڭ فولكلورىمىز، ەرتەگى، داستان-جىرلارىمىز قايشىعا ىلىنگەن. ۇكىمەت وزدەرىنە جاقپايتىن تۇستارىن كەسىپ الىپ تاستاپ وتىرعان. سونىڭ ءبارىن قايتادان قالپىنا كەلتىرىپ، تەكستولوگيالىق جۇمىس جاساپ، عىلىمي تۇسىنىكتەمەلەرىن جازىپ شىعاردىق. وسى الەمدە تەڭدەسى جوق مەگاجوبانى اتقارىپ، ۇيىمداستىرعان سەيىت اعا. وسى جۇمىسقا كىرىسكەندە «بىزدەن ءجۇز توم فولكلور شىقپايدى» دەپ بۇعان كۇمانمەن قاراعاندار دا بولدى. الايدا وسىنىڭ بار اۋىر سالماعىن م.اۋەزوۆ اتىنداعى ينستيتۋتتىڭ عالىمدارى جانە ينستيتۋت باسشىسى سەيىت اعا كوتەرىپ الدى. بۇگىنگە دەيىن تۇركى جانە الەم حالىقتارىندا ءجۇز توم فولكلورى بار تەك قازاق حالقى عانا. سەيىت اعا بىزگە «قازاق حالقىنىڭ مۇراسى ءۇش جەردە ساقتالعان. ونىڭ ءبىرىنشىسى، ەسكى قورىمداردى قازساڭ، ارحەولوگيالىق مۇراڭ شىعادى. ەكىنشىسى، حالقىمىزدىڭ التىن ساندىق كەۋدەسىن قازىپ، كوزى ءتىرى اقساقال اتا-اپالارىمىزدان جازىپ الساڭ، سوندا قازىنا بار. ءۇشىنشىسى، قولجازبا، ارحيۆ، قويمادا تۇرعان دۇنيەلەر. وسىنىڭ ءبارىن جيناۋ كەرەك» دەيتىن. س.قاسقاباسوۆ 1950 جىلدارى عىلىمعا كەلدى. م.اۋەزوۆ باتاسىن بەرىپ، قازاق ەرتەگىسىن زەرتتەۋگە باعىتتاعان. كەيىننەن قازاقتىڭ قيال-عاجايىپ ەرتەگىسىن ەتنوگرافيكالىق قىرىنان، سالت-داستۇرىمىزبەن بايلانىستىرىپ زەرتتەدى. سودان سوڭ شىعىس مۇرالارىمەن، اراب، پارسى الەمىمەن ساباقتاستىرىپ زەردەلەدى. ءبىزدىڭ مادەني مۇرامىزدىڭ كوبىسىنىڭ شىعىسپەن تامىرلاسىپ تۇرعانىن سول كەزدىڭ وزىندە عىلىمي تۇرعىدا ايقىنداپ بەردى. قۇران كارىمدى سوۆەت وكىمەتى كەزىندە عىلىمي نىسانعا اينالدىردى. ول جىلدارى قۇران كارىمدى عىلىمي اينالىمعا كىرگىزبەك تۇگىلى، ونىڭ اتىن ايتقانداردى مانسۇقتايتىن. سونداي-اق سەيىت اعا اۋىز ادەبيەتىمىزدەگى ۇلكەن پروزانى نەگىزدەپ، ەرتەگى، اڭىزداردى جەكە-جەكە جانر ەتىپ جاسادى. مۇنى «حالىق پروزاسى» دەپ اتادى. تۇركى ەلدەرىنىڭ كوبىسىندە سەيىت اعانىڭ شاكىرتتەرى بار. تۇركيادا، تاتارستاندا، وزبەكستاندا، قىرعىزستاندا بۇل كىسىنى بىلەدى، ەڭبەكتەرىمەن جاقسى تانىس. دەمەك سەيىت اعا قازاق فولكلورتانۋىن حالىقارالىق دەڭگەيگە كوتەرگەن عالىم. سەيىت اعا وزىندىك كوزقاراس، پىكىر ۇستانىمىندا وتە تاباندى قايراتكەر. ءوزى بەت العان جولىنان بۇرىلىپ، اينالاسىنا جالتاقتامايتىن. بوسمويىن بولىپ، بىلق-سىلق ەتىپ بيلىكتى جاقتاپ، بىرەۋلەردىڭ جەتەگىندە كەتىپ قالمايتىن. بۇل كىسى وتە تاباندى، ءوز مۇراتىنا، عىلىمعا، اتا-باباسىنا ادال، باتىر مىنەزدى كىسى ەدى. جۇمىس ۋاقىتىندا كابينەتىنە بارا قالساڭ باستاپقىدا ءتۇسى سۇستى، بيۋروكرات سياقتى كورىنەدى. ويتكەنى وتە ءتارتىپتىڭ، جاۋاپكەرشىلىكتىڭ ادامى. وسى تەمىردەي ءتارتىبىنىڭ ارقاسىندا «بابالار ءسوزىنىڭ» ءجۇز تومىن دايىنداپ شىقتى. ءتىپتى جىگەر كۇشىن، دەنساۋلىعىن دا عىلىمعا ارنادى. كابينەتىندە سۇستى دەدىك، ەندى ۇيىنە بارا قالساڭ مەيىربان قازاقتىڭ قارياسىن كورەسىز. تامارا تاتەم مارقۇم دا داستارقاندى كول-كوسىر ەتىپ جاسايتىن، اس ۇستىندە ەركىن وتىرىپ ءازىل-قالجىڭىن ارالاستىرىپ، اڭگىمەمىزدى ايتاتىنبىز. سوسىن كابينەتىنە باراردىڭ الدىندا دومبىرا تارتادى، وزىڭە دومبىرا ۇسىنادى. ارقانىڭ جاقسى اندەرىن ايتاتىن. ءسويتىپ كوڭىلىن كوتەرگەننەن كەيىن كابينەتىنە بارىپ، شاكىرتتەرىمەن جۇمىسىن باستايتىن. شاكىرتتەرىنەن كىتاپ ايامايتىن. سۇراعان كىتابىڭدى قولىڭدى قاقپاي بەرىپ، تىزىمدەپ الىپ قالاتىن. ۇنەمى شاكىرتتەرىم ۇيرەنسىن، بولسىن دەپ تىلەپ وتىراتىن، ۇنەمى شاكىرتتەرىنىڭ جولىن اشاتىن ۇستا ادام ەدى. مەنى عىلىمعا اكەلگەن دە سەيىت اعا. بۇكىل كىتاپتارىمدى قاداعالاپ شىعارتتى. ارنايى تاپسىرما بەرىپ، «فولكلورداعى تۇركى-مونعول بىرلىگى» دەگەن سالانى ماعان جۇكتەدى. شاكىرتتەرىنىڭ ءار قايسىسىنا ءارتۇرلى تاقىرىپ بەردى. مىسالى، ك.ماتىجانوۆقا باسىندا بالالار فولكلورىن بەردى، كەيىننەن وتباسىلىق عۇرىپ فولكلورىن بەرىپ، قورعاتقىزدى. ءشامشادين كەرىمگە سال سەرىلەردەن كانديداتتىق، قازاق جۇمباعىنان دوكتورلىق قورعاتتىردى. سوندا شاكىرتتەرىنە «تاباندى، قايسار بولىڭدار، ورتا جولدان تايقىپ كەتەتىن قازاقتىڭ جامان ءبىر مىنەزى بار. ولاي بولماۋى كەرەك. عىلىمعا كەلدىڭ بە، سوڭىنا دەيىن كۇرەس، ءتىپتى سونىڭ جولىندا ءوزىڭدى قۇرباندىققا شالۋعا دايىن بول» دەيتىن. ءوزى ومىردە سوندايعا بارعان كىسى. ومىردە اسا قاناعاتشىل ادام ەدى. بايلىققا، سىيلىققا، جىلتىراق دۇنيەلەرگە ونشا ءۇيىر بولمادى. ول كىسى حالقىم، عىلىم، قازاق حالقىنىڭ رۋحاني قازىناسى دەپ ومىردەن ءوتتى. ادام رەتىندە باقىتتى عۇمىر كەشتى. نەمەرە، شوبەرە ءسۇيدى. ۇرپاقتارى ەل قاتارلى تىرشىلىك ەتىپ جاتىر. شاكىرتتەرىنە دە، ۇرپاقتارىنا دا كوڭىلى تولاتىن. سوندىقتان ارمانى جوق كىسى دەپ ايتساق بولادى. تەك «قازاقتىڭ تاۋەلسىزدىگى ءماندى، ماڭگى بولسىن» دەگەن ارمان-مۇراتى بار ەدى. سەيىت اعا كەشە عانا ومىردەن كوشكەن م.ماعاۋين، ءا.ءتارازيدىڭ دوسى ەدى، بىرىنەن كەيىن ءبىرى كەتىپ، ۇلىلار سيرەپ بارادى. اعامىزدىڭ الدى يماندى، ارتى قايىرلى بولسىن. رۋحى پەيىشتە شالقىسىن!اقەدىل تويشان
ادەبيەت پەن عىلىمعا ادالدىق تانىتتى
كورنەكتى عالىم، ءسوز ونەرى، قازاق تاريحى جونىندە جان-جاقتى زەرتتەۋلەر جۇرگىزگەن سەيىت اعامىز دۇنيەدەن كوشىپتى. ول كىسىنىڭ قازاق رۋحانياتىنا قوسقان ۇلەسى سان سالالى، ارنالى. اعامىزدى تەك فولكلورتانۋشى دەي المايمىن، اۋىز ادەبيەتىمەن قاتار قازاق جازبا ادەبيەتى تۋرالى دا ىرگەلى ەڭبەكتەر جازدى. قازاق تەاترتانۋ سالاسىنا دا ەلەۋلى ۇلەس قوستى، قازاق سوۆەت ەنتسيكلوپەدياسىنىڭ اۆتورلارىنىڭ ءبىرى. تەك قازاق فولكلورى ەمەس، كۇللى تۇركى، تمد حالىقتارىنىڭ فولكلورىن زەرتتەۋدە ولشەۋسىز ەڭبەك ەتتى. اسىرەسە حالىقتىق پروزانى زەرتتەۋدە ادەبيەتتانۋعا تىڭ كوزقاراس الىپ كەلدى. بۇرىن اڭىز بەن ەرتەگىنى عانا ايتساق، س.قاسقاباسوۆ قازاقتا ميف بار ەكەنىن دالەلدەپ بەردى. بۇرىن ميف ەجەلگى گرەكتەر مەن ريمدە عانا بار دەپ ەسەپتەۋشى ەدىك، ال سەيىت اعامىز ادەبيەتتانۋ عىلىمىندا ميف قازاق حالىقتىق پروزاسىنىڭ اجىراماس بولشەگى ەكەنىن دالەلدەدى. سونداي-اق سەكەڭ تالاي شاكىرتتىڭ، بۇگىندە الدى ازۋلى ادەبيەتتانۋشىعا اينالعان تالاي ادەبيەتشىنىڭ جولىن اشىپ، باتاسىن بەرگەن ۇلى ۇستاز ەدى. مۇنى قازىر ءبىرى بىلسە، ءبىرى بىلمەس. بۇگىندە «قاسقاباسوۆتىڭ مەكتەبىنەن» ءوتىپ، عالىمنىڭ الدىن كورگەن شاكىرتتەرى ادەبيەتتانۋدا ىرگەلى ەڭبەكتەر جازىپ ءجۇر. وسى ورايدا ەۆرازيا ۇلتتىق ۋنيۆەرسيتەتىنە سىڭىرگەن ەڭبەگىن ەرەكشە اتاپ وتكەن ءجون بولار. اسىرەسە فيلولوگيا فاكۋلتەتىنىڭ كادرلىق جاعىنان قالىپتاسۋىنا كوپ قىزمەت ەتتى. ۋنيۆەرسيتەت اشىلعان جىلدارى عىلىمي شىعىستانۋ ورتالىعىنىڭ باسشىسى بوپ قىزمەتكە باردى. كەيىنگى جىلدارى قازاق ادەبيەتى كافەدراسىنىڭ مەڭگەرۋشىسى بولدى. وسى ۋنيۆەرسيتەت قالىپتاسقان كەزدەن ەلەۋلى ەڭبەك ءسىڭىرىپ، دامۋىنا ۇلەس قوستى. كەزىندە استاناعا باتپاق، ماسا دەپ ەشكىم كوشكىسى كەلمەگەنى راس. سول زامانداردا ەلورداعا العاشقى قارلىعاش بوپ، عىلىمنىڭ كوشىن باستاپ بارىپ، اينالاسىنا مىقتى ادەبيەتشىلەردى توپتاستىردى. رىمعالي نۇرعالي، ديقان قامزابەكۇلى سىندى زەرتتەۋشىلەردى شاقىرىپ، سولاردىڭ ۇيىتقىسى بولعانى ەسىمىزدە. استاناعا كوشكەن عالىمنىڭ ءبارى دەرلىك ەڭ اۋەلى سەيىت اعانىڭ ۇيىنە بارىپ، تامارا اپايدىڭ شايىن ىشەتىن. كەيىن سەكسەن جاسىندا الماتىنى ساعىنىپ، ينستيتۋتقا قايتا كەلدى. رەداكتسيادا ءدال قازىر اتقارىپ جاتقان جۇمىستارى بار ەدى. بۇگىندە بەس تومدىق جيناعى جارىق كوردى، دەگەنمەن وعان دا سىيماعان، تىس قالعان زەرتتەۋلەرى قانشاما. ءبىر تاڭعالدىراتىنى، اعامىزدىڭ قالامى جۇيرىك ەدى، جىلدام جازاتىن. عۇمىرىنىڭ سوڭىنا دەيىن ەڭبەكتەنىپ، زەرتتەۋمەن اينالىستى. ادەبيەتكە، عىلىمعا دەگەن ادالدىق وسى بولسا كەرەك. عىلىم جولىنداعى سارا جول، سارابدال بولمىسىنان بولەك، سەيىت قاسقاباسوۆتىڭ ادامگەرشىلىگى ءبىر توبە ەدى. جۇبايى تامارا جەڭگەمىز دە جاڭا جىلدىڭ قارساڭىندا قايتىپ ەدى. ەندى، مىنە، سوڭىنان سەيىت اعامىز دا ماڭگىلىككە ساپار شەكتى. ەكەۋى ءتورت بالا تاربيەلەپ ءوسىردى. تامارا اپايىمىز بەن سەرىك اعامىزدىڭ ماحابباتىنا، ادالدىعىنا سۇيسىنە قاراۋشى ەدىك! ورىندارى ويسىراپ قالدى. تالاي جىل ينستيتۋت ديرەكتورى، ءبولىم مەڭگەرۋشىسى بوپ جۇرگەن شاعىندا تەك باسشى ەمەس، ادامگەرشىلىگىمەن ەستە قالار ارداقتى اعامىزعا اينالىپ كەتتى. جەكىرىپ، ۇرىسۋدى بىلمەيتىن، ۇلت تاربيەسى مەن بولمىسى جايىندا ايتىپ قانا قويماي، اعامىز ءوزى دە سونىڭ جارقىن ۇلگىسى بولدى. كەزىندە اقسەلەۋ سەيدىمبەك اعامىز ەكەۋى بولىمدە وتىرعان شاعىندا ەكەۋارا اڭگىمەسى سونداي جاراسىمدى بولاتىن. ەكەۋىنىڭ ايتاتىن اڭگىمەسى نە ءبىر كىتاپتان دا قۇندى قازىنا ەدى. بۇگىندە اعامىزدىڭ تاربيەلەپ وسىرگەن ءتورت ۇلى دا ەلىمىزدىڭ وركەندەۋىنە ۇلەس قوسىپ جۇرگەن ەڭسەسى بيىك، ابىرويلى ازاماتتار. وتباسىنا، بالالارىنا قايعىرا كوڭىل ايتامىز!سەيىلبەك ساكەن
ۇقساس جاڭالىقتار
