وڭتۇستىك كورەيا پرەزيدەنتىنىڭ مىندەتىن اتقارۋشى حان دوك سۋ وتستاۆكاعا كەتتى. بۇل تۋرالى بۇگىن، 1 مامىردا Yonhap اگەنتتىگى جازدى، دەم حابارلايدى «ادىرنا» ءتىلشىسى.
«پرەزيدەنت مىندەتىن اتقارۋشى حان دوك سۋ 3 ماۋسىمدا پرەزيدەنتتىك سايلاۋعا تۇسەتىنىن اتاپ ءوتىپ، وتستاۆكاعا كەتكەنىن مالىمدەدى»،—دەلىنگەن حابارلامادا.
حان بۇل تۋرالى سەۋلدەگى ۇكىمەتتىك كەشەندە وتكەن ءباسپاسوز بريفينگىندە ايتقان.
«وسى قيىن ساتتە موينىما جۇكتەلگەن جاۋاپكەرشىلىكتى ەسكەرە وتىرىپ، بۇل جاعدايدى ۇزاق ۋاقىت وي ەلەگىنەن وتكىزدىم. مەنىڭ ويىمشا، بۇل — دۇرىس تاڭداۋ. سول سەبەپتى قازىرگى داعدارىستان شىعىپ، قولىمنان كەلگەننىڭ ءبارىن جاساۋ ءۇشىن قىزمەتىمدى تاستاۋ تۋرالى تۇپكىلىكتى شەشىم قابىلدادىم»،—دەپ ءتۇسىندىردى ول.
بۇعان دەيىن وڭتۇستىك كورەيا ۇكىمەتى مەرزىمىنەن بۇرىن پرەزيدەنت سايلاۋى 3 ماۋسىمدا وتەتىنىن حابارلاعان ەدى. بۇل شەشىم كونستيتۋتسيالىق سوت بۇرىنعى پرەزيدەنت يۋن سوك يولگە يمپيچمەنتتى رەسمي تۇردە جاريالاعاننان قابىلداندى.
سايلاۋعا تۇسۋگە نيەتتى مەملەكەتتىك قىزمەتكەرلەر 4 مامىرعا دەيىن ءوز لاۋازىمىنان وتستاۆكاعا كەتىپ، كانديداتۋراسىن ۇسىنۋى قاجەت. رەسمي ۇگىت-ناسيحات جۇمىستارى 12 مامىردا باستالادى.
