29 ءساۋىر كۇنى اتىراۋدا ءوز پاتەرىنەن 45 جاستاعى بيبىگۇل شپانوۆانىڭ ءمايىتى تابىلدى. ول NCOC كومپانياسىندا ءبولىم باسشىسى قىزمەتىن اتقارعان، مۇناي-گاز سالاسىندا 20 جىلدان استام تاجىريبەسى بار مامان بولعان، دەپ حابارلايدى "ادىرنا" ۇلتتىق پورتالى.
پوليتسيانىڭ مالىمەتىنشە، ايەلدىڭ دەنەسىندە پىشاق جاراقاتتارى بولعان، ال ۇيدەگى سەيف بۇزىلعان. قىلمىس اۆانگارد ىقشاماۋدانىنداعى "فرانتسۋز كۆارتالى" تۇرعىن ءۇي كەشەنىندە ورىن العان.
شپانوۆانىڭ تۋىستارى ادام قۇقىقتارى جونىندەگى بيۋروعا جۇگىنىپ، ءىستىڭ جان-جاقتى تەرگەلۋىن تالاپ ەتۋدە. ولار قىلمىستىڭ ايەلدىڭ كاسىبي قىزمەتىمەن بايلانىستى بولۋى مۇمكىن ەكەنىن جوققا شىعارمايدى.
جەدەل ىزدەستىرۋ شارالارى بارىسىندا 1987 جىلى تۋعان ازامات كۇدىكتى رەتىندە ۇستالىپ، ۋاقىتشا ۇستاۋ يزولياتورىنا قامالدى.
قازىر بۇل فاكت بويىنشا "ادام ءولتىرۋ" بابى بويىنشا قىلمىستىق ءىس قوزعالدى. ايعاق زاتتار تاركىلەنىپ، تەرگەۋ امالدارى جۇرگىزىلۋدە.
ايتا كەتەيىك، بيبىگۇل شپانوۆا كاشاعان كەن ورنىن يگەرۋ سەكىلدى ءىرى ۇلتتىق جوبالارعا قاتىسقان.
ال NCOC (North Caspian Operating Company) – قازاقستانداعى مۇناي-گاز سالاسىنداعى ەڭ ءىرى كومپانيالاردىڭ ءبىرى. كومپانيا ەلىمىزدىڭ تەڭىزدەگى مۇناي-گاز كەن ورىندارىن يگەرۋ جوباسىن جۇزەگە اسىرۋمەن اينالىسادى.
