ونەركاسىپ جانە قۇرىلىس ءمينيسترىنىڭ ورىنباسارى قۋاندىق قاجكەنوۆ ۇكىمەت وتىرىسىنان كەيىن وتكەن ءباسپاسوز ءماسليحاتىندا بورديۋر اۋىستىرعىش اكىمدەرگە قاشان توقتاۋ بولاتىنىن ايتتى، دەپ حابارلايدى «ادىرنا» ءتىلشىسى.
«استانانىڭ نۇرا اۋدانىندا جول جيەگىندەگى بورديۋرلەر مەن تاس توسەنىشتەردى اۋىستىرىپ جاتىر. حالىق اراسىندا بۇل سىبايلاس جەمقورلىققا جول اشاتىن ءتاسىلدىڭ ءبىرى دەگەن تۇسىنىك قالىپتاسقان. وسى بورديۋر اۋىستىرعىش اكىمدەرگە شەكتەۋ بولا ما؟»، - دەپ سۇرادى جۋرناليست.
قۋاندىق قاجكەنوۆ بورديۋر اۋىستىرۋدىڭ ءنورماتيۆى بولاتىنىن ايتتى. مەملەكەت بۇرىن قۇرىلىس جۇمىستارىنا بەرىلەتىن كەپىلدىك مەرزىمىن 2 جىلمەن شەكتەپ كەلسە، ەندى 5 جىلعا ۇزارتپاقشى ەكەن. ونىڭ ايتۋىنشا، بۇل دا ءوز كەزەگىندە بورديۋر اۋىستىرعىش اكىمدەرگە تىيىم بولادى
«ءبىز مينيسترلىك اتىنان ساياساتتى بەلگىلەيمىز. ساياسات بويىنشا ءار ماتەريالدىڭ، ءار قۇرىلىستىڭ جارامدىلىق مەرزىمى بار. سونىڭ اياسىندا جەرگىلىكتى اكىمدىكتەر ءوز جۇمىسىن ىستەيدى. ءسىز ايتقان بورديۋرلەر مەن برۋسچاتكالاردى اۋىستىرۋدىڭ ءوز مەرزىمى بار. قازىر اكىمدىكتەر بۇكىل قۇرىلىستى قاعاز جۇزىندە عانا جۇرگىزبەۋ ءۇشىن ەلەكتروندى جۇيەنى ەنگىزىپ جاتىرمىز. زەرتتەۋ اكتىسى، تەحنيكالىق زەرتتەۋ، ءبورديۋردىڭ ەسكىرۋ كورسەتكىشى، توزىمدىلىك قاسيەتى سياقتى مالىمەتتەردىڭ ءبارى ەلەكتروندى جۇيەگە ەنگىزىلەدى.
قۇرىلىس كومپانيالارىنىڭ ناقتى قانداي جۇمىستى قانداي ساپادا ورىنداعانىن وسى ەلەكتروندى جۇيەدەن قاداعالاۋعا بولادى. قوسىمشا قاداعالاۋ جۇمىستارىن دا ەشكىم قولدانىستان شىعارعان جوق»، - دەدى ۆيتسە-مينيستر.
