قازاقستاندا سۇيىتىلعان گاز بەن بولات دايىندامالارىن ەكسپورتتاۋعا سالىنعان تىيىم ۇزارتىلدى، دەپ حابارلايدى "ادىرنا" ۇلتتىق پورتالى.
بۇل تۋرالى ۇكىمەتتە وتكەن سىرتقى ساۋدا ساياساتى جانە حالىقارالىق ەكونوميكالىق ۇيىمدارعا قاتىسۋ ماسەلەلەرى جونىندەگى ۆەدومستۆوارالىق كوميسسيا وتىرىسىنان كەيىن بەلگىلى بولدى.
قازاقستان رەسپۋبليكاسىنىڭ ساۋدا جانە ينتەگراتسيا مينيسترلىگىنىڭ ءباسپاسوز قىزمەتى تۇسىندىرگەندەي، بۇعان دەيىن سۇيىتىلعان مۇناي گازىن شەكارالاس ەلدەرگە زاڭسىز شىعارۋدىڭ الدىن الۋ جانە ىشكى نارىقتاعى تاپشىلىقتىڭ بولماۋىن قامتاماسىز ەتۋ ماقساتىندا ەكسپورتقا تىيىم سالىنعان ەدى.
سونىمەن قاتار، ەلدەن بولات دايىندامالارى مەن جارتىلاي فابريكاتتاردى شىعارۋعا قويىلعان تىيىم تاعى التى ايعا ۇزارتىلدى. ساۋدا مينيسترلىگى بۇرىن ەنگىزىلگەن شەكتەۋلەردىڭ وڭ ناتيجەسى رەتىندە مەتاللۋرگيا ونەركاسىبىندە تەرەڭ وڭدەۋگە باعىتتالۋ ارتقانىن جانە ارماتۋرا ەكسپورتىنىڭ كولەمى شامامەن 30 مىڭ تونناعا كوبەيگەنىن اتاپ ءوتتى.
بۇدان بولەك، ەۋرازيالىق ەكونوميكالىق وداققا كىرمەيتىن ەلدەردەن قازاقستانعا گيپسوكارتون مەن تاس ونىمدەرىن اكەلۋگە ءۇش ايلىق تىيىم سالۋ ۇسىنىسى قولداۋ تاپتى.
"2024 جىلى قازاقستاندا 95,2 مىڭ توننا برۋسچاتكا ءوندىرىلىپ، ىشكى تۇتىنۋ كولەمى 58,76 مىڭ توننانى قۇرادى. ال گيپسوكارتون 35,5 ميلليون شارشى مەتر ءوندىرىلىپ، ەل ىشىندەگى سۇرانىس 38,8 ميلليون شارشى مەترگە جەتتى. سونىمەن بىرگە، وتاندىق كاسىپورىنداردىڭ وندىرىستىك قۋاتتىلىعى 46 ميلليون شارشى مەتردى قۇرايدى. قازاقستاندىق گيپسوكارتون مەن تاس ونىمدەرىن وندىرۋشىلەر وسى ءونىم تۇرلەرىنىڭ باعاسىن ساقتاۋعا مىندەتتەمە الدى", – دەپ ءتۇسىندىردى ساۋدا مينيسترلىگى.
بۇعان دەيىن قازاقستاننىڭ سۇيىتىلعان گاز بەن پروپاندى ەلدەن شىعارۋعا تىيىمدى 2025 جىلعى 14 مامىردان باستاپ ۇزارتاتىنى تۋرالى حابارلانعان بولاتىن. ءتيىستى بۇيرىق جوباسى "اشىق نقا" پورتالىندا جاريالانعان.
