وزبەكستاننىڭ تۇڭعىش پرەزيدەنتىنىڭ قىزى گۇلنارا كاريموۆانىڭ شۆەيتساريادان قايتارىلعان زاڭسىز اكتيۆتەرى دەنساۋلىق ساقتاۋ جانە ءبىلىم بەرۋ سالالارىنداعى جوبالارعا باعىتتالعان. بۇل تۋرالى وزبەكستاننىڭ قارجى مينيسترلىگىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ءسوز العاشقى ترانش – 131 ميلليون دوللار تۋرالى. وسى قاراجاتتىڭ ءبىر بولىگىنە 5841 بىرلىك زاماناۋي مەديتسينالىق قۇرال-جابدىق ساتىپ الىندى. بۇل تەحنيكا ەل بويىنشا ورنالاسقان 230 پەريناتالدىق ورتالىققا تاراتىلدى. سونىمەن قاتار، دارىگەرلەر پايدالاناتىن 1400-دەن استام قۇرال-جابدىقتى قوسىمشا ساتىپ الۋ جوسپارلانىپ وتىر.
بۇدان بولەك، باسقا دا جوبالار قارجىلاندىرىلدى. مىسالى، بۇۇ ۇيىمدارىنىڭ قولداۋىمەن 11 مىڭنان استام وزبەكستاندىق مەديتسينا قىزمەتكەرى ارنايى وقۋدان ءوتتى. پەرزەنتحانالاردا حالىققا قىزمەت كورسەتۋگە ارنالعان 29 ۇلتتىق حاتتاما مەن ادىستەمەلىك نۇسقاۋلىقتار حالىقارالىق ستاندارتتارعا سايكەستەندىرىلدى.
قاراجاتتىڭ ءبىر بولىگى ءبىلىم بەرۋ سالاسىنا دا ءبولىندى. مۇندا ەكى ءىرى باستاما ىسكە اسىرىلىپ جاتىر. ءبىرىنشىسى – اقپاراتتىق تەحنولوگيالار مەن تسيفرلىق شەشىمدەر ەنگىزۋ ارقىلى ءبىلىم بەرۋ مۇمكىندىكتەرىن كەڭەيتۋ جوباسى. ەكىنشىسى – مەكتەپتەردەگى سانيتارلىق-گيگيەنالىق جاعدايدى جاقسارتۋ، جىلىتۋ جۇيەلەرىن جاڭعىرتۋ جانە ءبىلىم بەرۋ مەكەمەلەرىن باسقارۋعا قوعامدى تارتۋعا باعىتتالعان جوبانى ازىرلەۋ.
مينيسترلىك 2022 جىلى وزبەكستان مەن شۆەيتساريا اراسىنداعى كەلىسىم اياسىندا بۇۇ-نىڭ كوپجاقتى تراست قورى جانىنان «يشونچ» قورى قۇرىلعانىن ەسكە سالدى. گۇلنار كاريموۆانىڭ زاڭسىز اكتيۆتەرى ءدال وسى قۇرىلىم ارقىلى قايتارىلادى. قاراجاتتى بولۋگە ازاماتتىق قوعامنىڭ ستراتەگيالىق جانە كەڭەسشى كەڭەستەرى قاتىسادى.
بۇعان دەيىن حابارلانعانداي، شۆەيتساريا بيلىگى قايتارعان العاشقى ترانش كولەمى – 131 ميلليون دوللار. سونداي-اق، ەكىنشى ترانش اياسىندا 182 ميلليون دوللاردى قايتارۋ جونىندە دە كەلىسىم بار.
ءساۋىر ايىنىڭ باسىندا بەلگيا دا وزبەكستانعا تەلەكوممۋنيكاتسيا سالاسىنداعى كوررۋپتسيا مەن قارجى جىمقىرۋ ءىسى بويىنشا 108 ميلليون دوللاردى قايتاراتىنى حابارلانعان. بۇل اكتيۆتەر دە كاريموۆاعا قاتىسى بار كومپانيالارعا تيەسىلى بولۋى مۇمكىن.
2022 جىلدىڭ قىركۇيەگىندە وزبەكستان ادىلەت مينيسترلىگى گۇلنارا كاريموۆانىڭ شەتەلدەردە ورنالاسقان زاڭسىز اكتيۆتەرىنىڭ جالپى سوماسى شامامەن 1,3 ميلليارد دوللاردى قۇرايتىنىن مالىمدەگەن.
ەۋروپا ەلدەرىندە كاريموۆانىڭ جانە ونىمەن بايلانىستى كومپانيالاردىڭ قىلمىستىق ارەكەتتەرىنە قاتىستى تەرگەۋلەر 2012 جىلى باستالعان. تەرگەۋ ناتيجەسىندە كاريموۆا وزبەكستان نارىعىنا شىعۋ ءۇشىن تەلەكوممۋنيكاتسيالىق كومپانيالاردان (TeliaSonera, Vimpelcom, Alfa Telecom, متس) ءىرى كولەمدە پارا العانى جانە ول قاراجاتتى نەگىزىنەن شۆەيتساريادا زاڭسىز جولمەن جاسىرىپ، اقشانى جىلىستاتقان ارەكەتتەرى دالەلدەنگەن. 2018 جىلى شۆەيتساريا كاريموۆانىڭ 555 ميلليون دوللاردان استام اكتيۆىن تاركىلەگەن.
وزبەكستاندا 2013 جىلدان باستاپ كاريموۆاعا قاتىستى بىرنەشە قىلمىستىق ءىس قوزعالعان. وعان ۇرلىق، سالىقتان جالتارۋ جانە قىلمىستىق توپ ۇيىمداستىرۋ ايىپتارى تاعىلعان. سوت ۇكىمى بويىنشا ول 13 جىلعا باس بوستاندىعىنان ايىرىلىپ، تاشكەنت ماڭىنداعى ايەلدەر كولونياسىنا قامالعان.
