قاراعاندى وبلىسىنىڭ پروكۋراتۋراسى مەن ۇلتتىق قاۋىپسىزدىك كوميتەتىنىڭ دەپارتامەنتى بىرلەسكەن جەدەل ءىس-شارالار ناتيجەسىندە شەتەل ازاماتتارىن زاڭسىز تىركەۋمەن اينالىسقان قىلمىستىق توپتىڭ قىزمەتىن توقتاتتى، دەپ حابارلايدى "ادىرنا".
پروكۋراتۋرا مالىمەتىنشە، توپ قۇرامىندا حالىققا قىزمەت كورسەتۋ ورتالىقتارىنىڭ قىزمەتكەرلەرى، مەديتسينالىق ۇيىمداردىڭ وكىلدەرى جانە دەلدال رەتىندە جۇمىس ىستەگەن «كومەكشىلەر» بولعان. تەرگەۋ دەرەكتەرى ولار شەتەل ازاماتتارىنا 700-دەن استام ۋاقىتشا تۇرۋعا رۇقساتتى زاڭسىز راسىمدەگەنىن كورسەتەدى. تىركەۋ زاڭىنا سايكەس، مۇنداي رۇقسات بەرۋ ءۇشىن تۇرعىن ءۇي يەسىنىڭ جەكە كەلىپ، كەلىسىم بەرۋى قاجەت، الايدا شەتەلدىكتەردىڭ تىركەلۋى بۇل تالاپتار ورىندالماي جۇزەگە اسقان.
سونىمەن بىرگە، قىلمىستىق توپ مۇشەلەرى ەكى زاڭسىز ەلەكتروندىق تسيفرلىق قولتاڭبا دايىنداپ، eQonaq اقپاراتتىق جۇيەسىنە 30-دان استام جالعان حابارلاما جىبەرگەن. بۇل ارەكەتتەر تسيفرلىق قولتاڭبا يەلەرىنىڭ كەلىسىمىنسىز جانە ولاردىڭ حابارىنسىز جاسالعان.
پروكۋراتۋرا مۇنداي زاڭسىز تىركەۋلەر ۇلتتىق قاۋىپسىزدىككە ەلەۋلى قاتەر توندىرەتىنىن، ەل اۋماعىنا نيەتى بۇزىق تۇلعالاردىڭ كىرۋىنە مۇمكىندىك جاسايتىنىن اتاپ ءوتتى. قازىرگى ۋاقىتتا وقيعانىڭ بارلىق ءمان-جايىن انىقتاۋ ءۇشىن الدىن الا تەرگەۋ ءجۇرىپ جاتىر.
