قازاقستان ديپلوماتتارى ستامبۋل ماڭىندا بولعان 6,2 ماگنيتۋدالى جەر سىلكىنىسىنەن كەيىنگى جاعدايدى باقىلاپ، تۇرىك بيلىگىمەن بايلانىستا وتىر، دەپ حابارلايدى "ادىرنا" ۇلتتىق پورتالى سىرتقى ىستەر مينيسترلىگىنىڭ ءباسپاسوز قىزمەتىنە سىلتەپ.
«تۇركيا بيلىگىنىڭ مالىمەتىنشە، 2025 جىلعى 23 ساۋىردە ستامبۋل توڭىرەگىندە 6,2 ماگنيتۋدالى جەر سىلكىنىسى تىركەلىپ، ونىڭ ارتىنان افتەرشوكتار جالعاسۋدا. قر سىرتقى ىستەر مينيسترلىگى جاعدايدىڭ دامۋىن تۇركيا بيلىگىمەن جانە قازاقستاننىڭ تۇركياداعى ديپلوماتيالىق وكىلدىكتەرىمەن ۇيلەستىرۋ ارقىلى باقىلاۋدا ۇستاپ وتىر»، – دەلىنگەن حابارلامادا.
مينيسترلىك مالىمەتىنە سۇيەنسەك، قازاقستان ازاماتتارىنان ستامبۋلداعى باس كونسۋلدىققا ەشقانداي ءوتىنىش تۇسپەگەن.
قازىرگى تاڭدا ستامبۋلدا كونسۋلدىق ەسەپتە 1137 قازاقستاندىق تۇر.
«وتانداستارىمىزدى سابىر ساقتاۋعا، ساقتىق شارالارىن ساقتاۋعا جانە جەرگىلىكتى بيلىك وكىلدەرىنىڭ نۇسقاۋلارىنا قاتاڭ تۇردە باعىنۋعا شاقىرامىز»، – دەدى مينيسترلىك.
ەسكە سالا كەتەيىك، بۇگىن تۇركيادا جەرگىلىكتى ۋاقىتپەن 12:49-دا سيليۆري قالاسىنان وڭتۇستىككە قاراي 26 شاقىرىم جەردە 6,2 ماگنيتۋدالى كۇشتى جەر سىلكىنىسى تىركەلگەن بولاتىن. جەر سىلكىنىسى تۇركيانىڭ توتەنشە جاعدايلار جانە تابيعي اپاتتاردىڭ سالدارىن جويۋ باسقارماسى (AFAD) مالىمەتىنە سايكەس، ستامبۋل، تەكيرداگ، يالوۆا، بۋرسا جانە بالىكەسير پروۆينتسيالارىندا سەزىلگەن.
سونداي-اق، ەۋروپا-جەرورتا تەڭىزى سەيسمولوگيا ورتالىعىنىڭ (EMSC) مالىمەتىنشە، ءمارمار تەڭىزى ماڭىنداعى 6,2 ماگنيتۋدالى نەگىزگى ءزىلزالادان كەيىن بىرنەشە ساعات ىشىندە ماگنيتۋداسى 5,0-دەن 1,6-عا دەيىنگى ارالىقتا 20-دان استام افتەرشوك بولعان.
