Qazaqstan dıplomattary Stambýl mańynda bolǵan 6,2 magnıtýdaly jer silkinisinen keıingi jaǵdaıdy baqylap, túrik bıligimen baılanysta otyr, dep habarlaıdy "Adyrna" ulttyq portaly Syrtqy ister mınıstrliginiń baspasóz qyzmetine siltep.
«Túrkııa bıliginiń málimetinshe, 2025 jylǵy 23 sáýirde Stambýl tóńireginde 6,2 magnıtýdaly jer silkinisi tirkelip, onyń artynan aftershoktar jalǵasýda. QR Syrtqy ister mınıstrligi jaǵdaıdyń damýyn Túrkııa bıligimen jáne Qazaqstannyń Túrkııadaǵy dıplomatııalyq ókildikterimen úılestirý arqyly baqylaýda ustap otyr», – delingen habarlamada.
Mınıstrlik málimetine súıensek, Qazaqstan azamattarynan Stambýldaǵy Bas konsýldyqqa eshqandaı ótinish túspegen.
Qazirgi tańda Stambýlda konsýldyq esepte 1137 qazaqstandyq tur.
«Otandastarymyzdy sabyr saqtaýǵa, saqtyq sharalaryn saqtaýǵa jáne jergilikti bılik ókilderiniń nusqaýlaryna qatań túrde baǵynýǵa shaqyramyz», – dedi mınıstrlik.
Eske sala keteıik, búgin Túrkııada jergilikti ýaqytpen 12:49-da Sılıvrı qalasynan ońtústikke qaraı 26 shaqyrym jerde 6,2 magnıtýdaly kúshti jer silkinisi tirkelgen bolatyn. Jer silkinisi Túrkııanyń Tótenshe jaǵdaılar jáne tabıǵı apattardyń saldaryn joıý basqarmasy (AFAD) málimetine sáıkes, Stambýl, Tekırdag, Ialova, Býrsa jáne Balykesır provınııalarynda sezilgen.
Sondaı-aq, Eýropa-Jerorta teńizi seısmologııa ortalyǵynyń (EMSC) málimetinshe, Mármár teńizi mańyndaǵy 6,2 magnıtýdaly negizgi zilzaladan keıin birneshe saǵat ishinde magnıtýdasy 5,0-den 1,6-ǵa deıingi aralyqta 20-dan astam aftershok bolǵan.
