ءماجىلىس دەپۋتاتى اسحات ايماعامبەتوۆ ماگيستراتۋرا مەن دوكتورانتۋراعا ءتۇسۋ تالاپتارى وزگەرۋى ءتيىس ەكەنىن مالىمدەدى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، تالاپكەرلەردەن اعىلشىن تىلىنەن مىندەتتى تۇردە ەمتيحان تالاپ ەتۋ — قازىرگى زاماندا عىلىمعا بەت بۇرعان جاستاردىڭ جولىن بوگەيتىن كەدەرگىگە اينالۋى مۇمكىن.
ايماعامبەتوۆ اعىلشىن ءتىلى عىلىم ءۇشىن اسا ماڭىزدى ەكەنىن مويىنداي وتىرىپ، بۇل تالاپتى كەزىندە ءوزى مينيستر بولعاندا ەنگىزگەنىن دە جاسىرمادى. الايدا ۋاقىت العا جىلجىعان سايىن تەحنولوگيالار وزگەرىپ، جاڭا مۇمكىندىكتەر پايدا بولۋىنا بايلانىستى بۇل تالاپقا قايتا كوز جۇگىرتۋ قاجەت ەكەنىن العا تارتتى.
"قازىر ChatGPT, Gemini سىندى قۇرالداردىڭ كومەگىمەن كەز كەلگەن عىلىمي ءماتىندى ساناۋلى سەكۋندتاردا ساپالى اۋدارۋعا بولادى. دەمەك، جاستار عىلىمي ىزدەنىسىن ەندى وسى تەحنولوگيالاردىڭ كومەگىمەن دە جۇرگىزە الادى"- دەدى ايماعامبەتوۆ.
دەپۋتات قازىرگى احۋالدى ەسكەرە وتىرىپ، قابىلداۋ ەرەجەلەرىن بىرقاتار باعىتتا قايتا قاراۋدى ۇسىندى.
1. اعىلشىن ءتىلىن مەكتەپتەن ساپالى ۇيرەتۋ
پرەزيدەنت تاپسىرماسىنا سايكەس باستالعان 3–4 جانە 10–11 سىنىپتارداعى اعىلشىن ءتىلى ساعاتتارىن كوبەيتۋ جۇمىستارىن ناقتى ىسكە اسىرۋ قاجەت.
2. اعىلشىن تىلىنەن ەمتيحاندى وقۋ سوڭىندا تاپسىرۋ
ەگەر ماگيستراتۋرا مەن دوكتورانتۋرادا وقىتۋ قازاق نەمەسە ورىس تىلىندە جۇرگىزىلسە، اعىلشىن تىلىنەن ەمتيحاندى وقۋ باستالعانعا دەيىن ەمەس، وقۋ اياقتالعان سوڭ تاپسىرۋ ۇسىنىلادى.
3. اعىلشىن تىلىندە وقىتاتىن باعىتتاردا تالاپتى كۇشەيتۋ
قوس ديپلومدى باعدارلامالار نەمەسە شەتەلدىك فيليالداردا وقيتىندار ءۇشىن اعىلشىن ءتىلى تالاپتارىن ساقتاۋ نەمەسە كۇشەيتۋ قاجەت.
4. ەسسە ورنىنا – ناقتى زەرتتەۋ ۇسىنىسى
دوكتورانتۋراعا تۇسەتىن ۇمىتكەرلەر ەسسە جازۋدىڭ ورنىنا عىلىمي زەرتتەۋ ۇسىنىسىن ۇسىنۋى ءتيىس. جازبا جۇمىستار تاۋەلسىز ساراپشىلارعا بەرىلۋى قاجەت.
5. عىلىمي ماقالا جاريالاۋ تالابىن يكەمدەۋ
Scopus سەكىلدى بەدەلدى بازالاردا ماقالا جاريالاۋ تالابىن ءار ماماندىقتىڭ ەرەكشەلىگىنە قاراي بەيىمدەۋ ۇسىنىلادى. مىسالى، مۋزىكا، قازاق فيلولوگياسى سياقتى سالالاردا بالاما تالاپتار ەنگىزىلۋى مۇمكىن.
"باستىسى – تالاپكەردىڭ ديسسەرتاتسياسى ساپالى بولۋى جانە عىلىمي ورتاعا ناقتى ۇلەس قوسۋى كەرەك", – دەيدى ايماعامبەتوۆ.
