Májilis depýtaty Ashat Aımaǵambetov magıstratýra men doktorantýraǵa túsý talaptary ózgerýi tıis ekenin málimdedi, dep habarlaıdy "Adyrna" ulttyq portaly.
Onyń aıtýynsha, talapkerlerden aǵylshyn tilinen mindetti túrde emtıhan talap etý — qazirgi zamanda ǵylymǵa bet burǵan jastardyń jolyn bógeıtin kedergige aınalýy múmkin.
Aımaǵambetov aǵylshyn tili ǵylym úshin asa mańyzdy ekenin moıyndaı otyryp, bul talapty kezinde ózi mınıstr bolǵanda engizgenin de jasyrmady. Alaıda ýaqyt alǵa jyljyǵan saıyn tehnologııalar ózgerip, jańa múmkindikter paıda bolýyna baılanysty bul talapqa qaıta kóz júgirtý qajet ekenin alǵa tartty.
"Qazir ChatGPT, Gemini syndy quraldardyń kómegimen kez kelgen ǵylymı mátindi sanaýly sekýndtarda sapaly aýdarýǵa bolady. Demek, jastar ǵylymı izdenisin endi osy tehnologııalardyń kómegimen de júrgize alady"- dedi Aımaǵambetov.
Depýtat qazirgi ahýaldy eskere otyryp, qabyldaý erejelerin birqatar baǵytta qaıta qaraýdy usyndy.
1. Aǵylshyn tilin mektepten sapaly úıretý
Prezıdent tapsyrmasyna sáıkes bastalǵan 3–4 jáne 10–11 synyptardaǵy aǵylshyn tili saǵattaryn kóbeıtý jumystaryn naqty iske asyrý qajet.
2. Aǵylshyn tilinen emtıhandy oqý sońynda tapsyrý
Eger magıstratýra men doktorantýrada oqytý qazaq nemese orys tilinde júrgizilse, aǵylshyn tilinen emtıhandy oqý bastalǵanǵa deıin emes, oqý aıaqtalǵan soń tapsyrý usynylady.
3. Aǵylshyn tilinde oqytatyn baǵyttarda talapty kúsheıtý
Qos dıplomdy baǵdarlamalar nemese sheteldik fılıaldarda oqıtyndar úshin aǵylshyn tili talaptaryn saqtaý nemese kúsheıtý qajet.
4. Esse ornyna – naqty zertteý usynysy
Doktorantýraǵa túsetin úmitkerler esse jazýdyń ornyna ǵylymı zertteý usynysyn usynýy tıis. Jazba jumystar táýelsiz sarapshylarǵa berilýi qajet.
5. Ǵylymı maqala jarııalaý talabyn ıkemdeý
Scopus sekildi bedeldi bazalarda maqala jarııalaý talabyn ár mamandyqtyń ereksheligine qaraı beıimdeý usynylady. Mysaly, mýzyka, qazaq fılologııasy sııaqty salalarda balama talaptar engizilýi múmkin.
"Bastysy – talapkerdiń dıssertaııasy sapaly bolýy jáne ǵylymı ortaǵa naqty úles qosýy kerek", – deıdi Aımaǵambetov.
