سەيسمولوگتار ستامبۋل ماڭىنداعى جەر سىلكىنىسىنەن كەيىن 20-دان استام افتەرشوكتى تىركەدى، دەپ حابارلايدى "ادىرنا" ۇلتتىق پورتالى.
ەۋروپا-جەرورتا تەڭىزى سەيسمولوگيا ورتالىعىنىڭ (EMSC) مالىمەتىنشە، ءمارمار تەڭىزى ماڭىنداعى 6,2 ماگنيتۋدالى نەگىزگى ءزىلزالادان كەيىن بىرنەشە ساعات ىشىندە ماگنيتۋداسى 5,0-دەن 1,6-عا دەيىنگى ارالىقتا 20-دان استام افتەرشوك بولعان.
قايتالانعان جەراستى دۇمپۋلەرى ستامبۋل مەن وعان جاقىن ورنالاسقان وڭىرلەردە سەزىلگەن. ساراپشىلار افتەرشوكتار بىرنەشە كۇنگە سوزىلۋى مۇمكىن ەكەنىن ايتىپ، قاۋىپسىزدىك شارالارىن ساقتاۋعا شاقىرۋدا.
بۇعان دەيىن 23 ءساۋىر كۇنى جەرگىلىكتى ۋاقىتپەن 12:49-دا سيليۆري قالاسىنان وڭتۇستىككە قاراي 26 شاقىرىم جەردە 6,2 ماگنيتۋدالى كۇشتى جەر سىلكىنىسى تىركەلگەن بولاتىن.
جەر سىلكىنىسى تۇركيانىڭ توتەنشە جاعدايلار جانە تابيعي اپاتتاردىڭ سالدارىن جويۋ باسقارماسى (AFAD) مالىمەتىنە سايكەس، ستامبۋل، تەكيرداگ، يالوۆا، بۋرسا جانە بالىكەسير پروۆينتسيالارىندا سەزىلدى. قازا تاپقاندار مەن قيراعان عيماراتتار تۋرالى اقپارات تۇسپەگەن.
سونداي-اق، تۇركيا پارلامەنتىنىڭ سپيكەرى نۋمان كۋرتۋلمۋش تابيعي اپاتقا دايىن بولۋعا شاقىردى.
"ستامبۋلدا كۇتىلەتىن جەر سىلكىنىسى تابالدىرىقتا تۇر. ءبىزدىڭ مەكەمەلەرىمىز، حالقىمىز – بارلىعىمىز مۇنداي اپاتتى ەڭ از شىعىنمەن ەڭسەرۋگە دايىن بولۋىمىز كەرەك", – دەدى ول.
