قازاقستان اۋعانستاندا تەمىرجول سالۋعا 500 ميلليون دوللار ينۆەستيتسيا سالۋعا دايىن. بۇل تۋرالى قازاقستاننىڭ ۇلتتىق ەكونوميكا ءمينيسترى سەرىك جۇمانعارين كابۋلدا اۋعانستاننىڭ ەكونوميكا جونىندەگى ۆيتسە-پرەمەرى ابدۋل عاني بارادارمەن كەزدەسۋدە مالىمدەدى، دەپ حابارلايدى "ادىرنا" ۇلتتىق پورتالى.
جوبا اۋعانستاننىڭ سولتۇستىگىندەگى تورگۋندي قالاسىنان گەراتقا دەيىن (ودان ءارى ەلدىڭ وڭتۇستىگىندەگى سپين-بولداكقا دەيىن) تەمىرجول باعىتىن تارتۋدى كوزدەيدى. سونداي-اق، قازاقستان بۇل جوبانى ىلگەرىلەتۋ ءۇشىن گەرات قالاسىندا كولىك-لوگيستيكالىق كومپانيا قۇرۋدى جوسپارلاپ وتىر.
سەرىك جۇمانعارين كابۋلعا 21 ءساۋىر كۇنى قازاقستان-اۋعانستان بيزنەس-فورۋمىنا قاتىسۋ ءۇشىن باردى. قازاقستان پرەمەر-ءمينيسترىنىڭ ءباسپاسوز قىزمەتى جۇمانعارين مەن ابدۋل عاني باراداردىڭ كەزدەسۋىنە ارنالعان ءباسپاسوز حابارلاماسىندا تەمىرجول جوباسىنا ينۆەستيتسيا سالۋ تۋرالى مالىمەتتى تاراتپاعان. بىراق قازاقستاندىق بيزنەس وكىلدەرىنىڭ اۋعانستانداعى پايدالى قازبالار كەن ورىندارىن بارلاۋعا قىزىعۋشىلىق ءبىلدىرىپ وتىرعانىن اتاپ وتكەن.
«14 ساۋىردە اۋعانستانعا قازاقستاننان گەولوگتار مەن ينجەنەرلەردەن قۇرالعان ماماندار توبى كەلدى. ولار اۋعانستاننىڭ تاۋ-كەن ونەركاسىبى جانە مۇناي مينيسترلىگىنىڭ قولداۋىمەن بىرنەشە كەن ورىندارىن ارالادى. قر يندۋستريا جانە قۇرىلىس ۆيتسە-ءمينيسترى يران شارحاننىڭ ايتۋىنشا، ماماندار نۇرىستان پروۆينتسياسىنداعى بەريللي، قورعاسىن جانە مىرىش كەزدەسەتىن بولۋى مۇمكىن پەرسپەكتيۆتى كەن ورىندارىنان 130 كگ كەن ۇلگىسىن جيناعان. ەندى بۇل ۇلگىلەر تەرەڭىرەك زەرتتەۋ ءۇشىن قازاقستانعا جونەلتىلىپ، زەرتحانالىق تالداۋدان كەيىن قازاقستاندىق تاراپ كەن ورىندارىن يگەرۋ بويىنشا تولىققاندى كەلىسسوزدەرگە دايىن بولدى»، – دەلىنگەن حابارلامادا.
تاراپتار ءوزارا ساۋدا اينالىمىن 3 ميلليارد دوللارعا دەيىن ۇلعايتۋعا جانە كابۋلدا قازاقستان ساۋدا ءۇيىن اشۋعا ۋاعدالاستى.
