بۇگىن ءماجىلىستىڭ پلەنارلىق وتىرىسىندا ازات پەرۋاشەۆ پرەزيدەنت جولداۋىنداعى ەكونوميكالىق باستامالار تاسادا قالىپ جاتقانىن ايتتى. ونىڭ سوزىنشە، مەملەكەت باسشىسىنىڭ ساياسي جانە الەۋمەتتىك باعدارى قوعامنىڭ قىزۋ تالقىلاۋىنا تۇسكەنىمەن، ەكونوميكالىق تۇسى ەلەۋسىز قالىپ وتىر.
پەرۋاشەۆ قاسىم-جومارت كەمەلۇلىنىڭ حالقىققا العاشقى جولداۋىندا سالىق جۇيەسىن جەتىلدىرۋ پروبلەماسىنا اسا نازار اۋدارعانىن ەسكە سالا وتىرىپ، فيسكالدى ورگانداردىڭ بۇل ماسەلەدە قيمىلسىز جاتقانىنا الاڭداۋشىلىعىن ءبىلدىردى.
«بۇگىنگى تاڭدا وزىمىزدىكىن وندىرگەننەن شەتەلدەن دايىن تاۋاردى اكەلىپ ساتۋ تيىمدىرەك ەكەنىن كورىپ وتىرمىز. ال ەگەر يمپورتتىق تاۋاردى ساتۋ ءبىر ادامنىڭ ۇلەسىنە عانا تيسە، ونى وندىرۋگە مىڭ ادامدى جۇمىلدىرۋعا بولار ەدى. تەك جۇمىسپەن قامتۋ ماسەلەسى شەشىلىپ قويماي، حالىقتىڭ ءال-اۋقاتىن كوتەرۋگە، ەكونوميكانىڭ دامۋىنا اسەر ەتەر ەدىك»، − دەدى «اق جولدىڭ» جەتەكشىسى.
وسىعان وراي «اق جول» پارتياسى ەكونوميكانىڭ باسىم سالالارى ءۇشىن قوسىمشا قۇن سالىعىن (ققس) تومەندەتۋدى ۇسىنادى.
اقجولدىقتاردىڭ سوزىنشە، يسپانيا، شۆەتسيا، ۇلىبريتانيا، گەرمانيا، اۆستريا، نيدەرلاندى، ليتۆا جانە ت.ب. كوپتەگەن ەلدەردە جالپى ققس 20-25% قۇراعانىمەن، ول سالىق اۋىل شارۋاشىلىعى ونەركاسىبىندە 0%-دى; جەڭىل جانە تاماق ونەركاسىبىندە 3-5%-دى; ماشينا جاساۋ، تۇرعىن ءۇي قۇرىلىسى جانە قۇرىلىس ماتەريالدارى، ءىت-تەحنولوگيالار سالاسىندا 6-8%-دى قۇراپ وتىر. كۇنى كەشە كورشىلەس رەسەي ەلى دە كەي اۋىل شارۋاشىلىق ونىمدەرى ءۇشىن تومەندەتىلگەن ققس ەنگىزگەن.
ەلىمىزدەگى سالىق سالۋ جۇيەسىنە اتالمىش وزگەرىستەردى پارتيا 2013 جىلدان بەرى بىرنەشە رەت ۇسىنىپ كەلە جاتقانىن اتاپ ءوتۋ كەرەك. ولاردىڭ ەسەبىنشە وتاندىق كاسىپورىندار مەن ەلىمىزدەگى شەتەلدىك كاسىپورىندار ءۇشىن بىردەي سالىق مولشەرىنىڭ بولۋى دۇرىس ەمەس. وتاندىق بيزنەستى قولدايمىز دەسەك، سالالىق ققس مولشەرلەمەلەرىن ەنگىزۋ ارقىلى سالىق زاڭناماسىنا وزگەرىستەر جاساۋ كەرەك.
«اق جول» پارتياسىنىڭ ءباسپاسوز قىزمەتى
