پولشانىڭ كراكوۆ قالاسىنداعى ورتالىق الاڭدا بولعان اتىس سالدارىنان كەمىندە بەس ادام قازا تاۋىپ، تاعى ونعا جۋىق ادام جارالاندى، دەپ حابارلايدى "ادىرنا" ۇلتتىق پورتالى ۆۆس-گە سىلتەپ.
قۇقىق قورعاۋ ورگاندارى شابۋىل جاسادى دەگەن كۇدىكتىنى ۇستادى. پوليتسيا مالىمەتىنشە، كۇدىكتى ۇستاۋ كەزىندە وق جاراقاتىن العان. قازىر ول اۋرۋحاناعا جەتكىزىلىپ جاتىر. Gazeta Wyborcza باسىلىمىنىڭ حابارلاۋىنشا، اتىس قالانىڭ باس بازار الاڭى ارقىلى ءوتىپ بارا جاتقان كولىكتەن جاسالعان. كۋاگەرلەردىڭ سوزىنشە، بەتپەردە كيگەن ەر ادام كولىكتىڭ ىشىنەن كوشەدەگى ادامدارعا قاراي ۇزدىكسىز وق اتقان.
پولشا بۇقارالىق اقپارات قۇرالدارى مالوپولسك ۆوەۆودستۆوسى پوليتسياسىنىڭ وكىلىنە سىلتەمە جاساپ، كۇدىكتىنىڭ اسكەري ۇلگىدەگى كيىم كيگەنىن جانە ۇزىن ۇڭعىلى قارۋمەن قارۋلانعانىن حابارلادى. ونىڭ كولىگىنەن وزگە دە قارۋ-جاراق پەن وق-دارىلەر تابىلعان. قازىر شابۋىل جاساعان ادامنىڭ جەكە باسى انىقتالىپ جاتىر.
اتىس جەرگىلىكتى ۋاقىت بويىنشا ساعات 16:00 شاماسىندا باستالعان. وقيعا كەزىندە الاڭ ماڭىنداعى دۇكەندەر مەن مەيرامحانالاردىڭ قىزمەتكەرلەرى كەلۋشىلەرمەن بىرگە عيماراتتاردىڭ ىشىنە تىعىلىپ، ەسىكتەرىن بەكىتكەن.
بۇدان بولەك، كالا كولىگى كاسىپورنىنىڭ مالىمەتىنشە، ورتالىق الاڭ ماڭىنداعى ترامۆايعا دا وق اتىلعان.
كۇدىكتىنى ۇستاۋ كەزىندە پوليتسيا قارۋ قولدانعان. الايدا ول دا وق جاۋدىرىپ، ناتيجەسىندە ەكى پوليتسيا قىزمەتكەرى جارالانعان.
وقيعا ورنىنا پولشا جەدەل مەديتسينالىق اۆياتسياسىنىڭ تىكۇشاعى قونعان. قاۋىپسىزدىك قىزمەتتەرى تۇرعىندارعا پوليتسيا رەسمي حابار بەرگەنگە دەيىن ۇيلەرىنەن شىقپاۋعا كەڭەس بەرگەن. باس بازار الاڭى قورشاۋعا الىنىپ، وعان اپاراتىن كوشەلەر جابىلعان.
پولشا پرەزيدەنتى كارول ناۆروتسكي كراكوۆتاعى قايعىلى وقيعا تۋرالى حابارلارعا الاڭداۋشىلىق ءبىلدىردى. ال پرەمەر-مينيستر دونالد تۋسك پوليتسيانىڭ تەرگەۋ باستاعانىن جانە ىشكى ىستەر مينيسترلىگىنەن جەدەل اقپارات الىپ وتىرعانىن ايتتى.
پولشانىڭ اقش-تاعى ەلشىسى توم روۋز بولعان وقيعانى بەيبىت تۇرعىنداردىڭ ءومىرىن قيعان قاتىگەز شابۋىل دەپ اتادى.
