Búgin Májilistiń plenarlyq otyrysynda Azat Perýashev Prezıdent Joldaýyndaǵy ekonomıkalyq bastamalar tasada qalyp jatqanyn aıtty. Onyń sózinshe, Memleket basshysynyń saıası jáne áleýmettik baǵdary qoǵamnyń qyzý talqylaýyna túskenimen, ekonomıkalyq tusy eleýsiz qalyp otyr.
Perýashev Qasym-Jomart Kemelulynyń Halqyqqa alǵashqy Joldaýynda salyq júıesin jetildirý problemasyna asa nazar aýdarǵanyn eske sala otyryp, fıskaldy organdardyń bul máselede qımylsyz jatqanyna alańdaýshylyǵyn bildirdi.
«Búgingi tańda ózimizdikin óndirgennen shetelden daıyn taýardy ákelip satý tıimdirek ekenin kórip otyrmyz. Al eger ımporttyq taýardy satý bir adamnyń úlesine ǵana tıse, ony óndirýge myń adamdy jumyldyrýǵa bolar edi. Tek jumyspen qamtý máselesi sheshilip qoımaı, halyqtyń ál-aýqatyn kóterýge, ekonomıkanyń damýyna áser eter edik», − dedi «Aq joldyń» jetekshisi.
Osyǵan oraı «Aq jol» partııasy ekonomıkanyń basym salalary úshin qosymsha qun salyǵyn (QQS) tómendetýdi usynady.
Aqjoldyqtardyń sózinshe, Ispanııa, Shveııa, Ulybrıtanııa, Germanııa, Avstrııa, Nıderlandy, Lıtva jáne t.b. kóptegen elderde jalpy QQS 20-25% quraǵanymen, ol salyq aýyl sharýashylyǵy ónerkásibinde 0%-dy; jeńil jáne tamaq ónerkásibinde 3-5%-dy; mashına jasaý, turǵyn úı qurylysy jáne qurylys materıaldary, IT-tehnologııalar salasynda 6-8%-dy qurap otyr. Kúni keshe kórshiles Reseı eli de keı aýyl sharýashylyq ónimderi úshin tómendetilgen QQS engizgen.
Elimizdegi salyq salý júıesine atalmysh ózgeristerdi partııa 2013 jyldan beri birneshe ret usynyp kele jatqanyn atap ótý kerek. Olardyń esebinshe otandyq kásiporyndar men elimizdegi sheteldik kásiporyndar úshin birdeı salyq mólsheriniń bolýy durys emes. Otandyq bıznesti qoldaımyz desek, salalyq QQS mólsherlemelerin engizý arqyly salyq zańnamasyna ózgerister jasaý kerek.
«Aq jol» partııasynyń baspasóz qyzmeti
