اقتاۋ اۋەجايىندا استانادان ۇشىپ كەلگەن Scat اۋە كومپانياسىنىڭ ۇشاعىندا جولاۋشىلاردىڭ ءبىرى قىزمەتكەردى ۇرىپ جىبەرگەن، دەپ حابارلايدى “ادىرنا” ۇلتتىق پورتالى.
كۋاگەر كاريمانىڭ lada.kz جەرگىلىكتى باسىلىمىنا ايتۋىنشا، جانجال 2025 جىلعى 20 ساۋىردە تۇنگى ساعات 00:05 شاماسىندا، ۇشاق قونعاننان كەيىن بىردەن باستالعان.
ونىڭ سوزىنشە، ەر ادامداردىڭ ءبىرى ۇشاقتان شىققان سوڭ، سالونىندا ۇيالى تەلەفونىن ۇمىت قالدىرعانىن ەسىنە ءتۇسىرىپ، قايتا كىرۋگە تىرىسقان. الايدا ونى بورتسەرىك توقتاتىپ، جولاۋشىلار ءالى تولىق شىقپاعاندىقتان، ءسال كۇتۋىن سۇراعان. بىراق ەر ادام بۇل وتىنىشكە قۇلاق اسپاي، سالونعا كۇشتەپ وتۋگە تىرىسىپ، كەيىن بورتسەرىكتى بەتىنەن ۇرىپ جىبەرگەن.
«بۇل ەر ادام ۇشۋ بارىسىندا ەشقانداي مازاسىزدىق تانىتقان جوق. سوندىقتان ءبىز ونىڭ مۇنداي ارەكەتىنەن مۇلدە كۇتپەگەن ەدىك، ءبارىمىز قاتتى اشۋلاندىق. جاقسى بولعانى — بورتسەرىك جىگىت مىقتى ەكەن، ال ەگەر ول قىز بولسا نە بولار ەدى؟ الگى ەر ادام ءىرى دەنەلى، جۇدىرىعىن كەز-كەلگەنگە سەرمەپ ءجۇردى، سول جەردە مۇگەدەك ايەل وتىرعان، باسقا دا جولاۋشىلار بولدى — بىرەۋ زارداپ شەگۋى مۇمكىن ەدى. مۇنداي ارەكەتكە قاتاڭ جازا قولدانۋ كەرەك، — دەيدى كاريما.
وقيعا ورنىنا پوليتسيا قىزمەتكەرلەرى كەلگەن. كۋاگەرلەردىڭ ايتۋىنشا، قۇقىق بۇزۋشىعا كومەكتەسۋ ءۇشىن ونىڭ تۋىسى دا كەلگەن. ول دا اگرەسسيۆتى مىنەز تانىتقان. ەكەۋى دە كىناسىن مويىنداماعان. بىراق وقيعانىڭ كۋاگەرلەرى شابۋىل فاكتىسىن راستاعان.
