Aqtaý áýejaıynda Astanadan ushyp kelgen Scat áýe kompanııasynyń ushaǵynda jolaýshylardyń biri qyzmetkerdi uryp jibergen, dep habarlaıdy “Adyrna” ulttyq portaly.
Kýáger Karımanyń lada.kz jergilikti basylymyna aıtýynsha, janjal 2025 jylǵy 20 sáýirde túngi saǵat 00:05 shamasynda, ushaq qonǵannan keıin birden bastalǵan.
Onyń sózinshe, er adamdardyń biri ushaqtan shyqqan soń, salonynda uıaly telefonyn umyt qaldyrǵanyn esine túsirip, qaıta kirýge tyrysqan. Alaıda ony bortserik toqtatyp, jolaýshylar áli tolyq shyqpaǵandyqtan, sál kútýin suraǵan. Biraq er adam bul ótinishke qulaq aspaı, salonǵa kúshtep ótýge tyrysyp, keıin bortserikti betinen uryp jibergen.
«Bul er adam ushý barysynda eshqandaı mazasyzdyq tanytqan joq. Sondyqtan biz onyń mundaı áreketinen múlde kútpegen edik, bárimiz qatty ashýlandyq. Jaqsy bolǵany — bortserik jigit myqty eken, al eger ol qyz bolsa ne bolar edi? Álgi er adam iri deneli, judyryǵyn kez-kelgenge sermep júrdi, sol jerde múgedek áıel otyrǵan, basqa da jolaýshylar boldy — bireý zardap shegýi múmkin edi. Mundaı áreketke qatań jaza qoldaný kerek, — deıdi Karıma.
Oqıǵa ornyna polıııa qyzmetkerleri kelgen. Kýágerlerdiń aıtýynsha, quqyq buzýshyǵa kómektesý úshin onyń týysy da kelgen. Ol da agressıvti minez tanytqan. Ekeýi de kinásin moıyndamaǵan. Biraq oqıǵanyń kýágerleri shabýyl faktisin rastaǵan.
