مەملەكەت باسشىسى قاسىم-جومارت توقاەۆ پراۆوسلاۆتىق حريستيانداردى پاسحا مەيرامىمەن قۇتتىقتادى، دەپ حابارلايدى "ادىرنا" ۇلتتىق پورتالى.
قۇتتىقتاۋ ءماتىنىن بۇگىن اقوردانىڭ ءباسپاسوز قىزمەتى جاريالادى.
"قىمباتتى وتانداستار! ەلىمىزدەگى بارلىق حريستيان قاۋىمىن پاسحا مەرەكەسىمەن شىن جۇرەكتەن قۇتتىقتايمىن! بۇل نۇرلى مەيرام – رۋحاني جاڭعىرۋ مەن تازارۋدىڭ بەلگىسى، ول سەنۋشى جانداردىڭ جۇرەگىنە ءۇمىت پەن قۋانىش ۇيالاتادى. بيىل پراۆوسلاۆتار، كاتوليكتەر مەن پروتەستانتتار پاسحانى ءبىر كۇندە اتاپ ءوتىپ جاتقانى ەرەكشە سيمۆولدىق مانگە يە", – دەدى توقاەۆ.
پرەزيدەنتتىڭ ايتۋىنشا، حريستيان ءدىنى دە باسقا دىندەر سياقتى قوعامىمىزدىڭ ومىرىندە ماڭىزدى ءرول اتقارادى. جوعارى گۋمانيستىك يدەالداردى ناسيحاتتاي وتىرىپ، پاسحا داستۇرلەرى ەجەلدەن-اق وتباسىلىق قۇندىلىقتاردى ساقتاۋعا، حالقىمىزدىڭ بىرلىگى مەن ىنتىماعىن نىعايتۋعا ىقپال ەتىپ كەلەدى. ولار ادامداردى جاقسىلىق پەن كەلىسىمگە شاقىرادى.
توقاەۆ قازاقستاننىڭ ورنىقتى دامۋىنىڭ بەرىك نەگىزى – ەلدەگى ەتنوستار مەن كونفەسسيا وكىلدەرىنىڭ اراسىنداعى جالپىۇلتتىق بىرلىك، ءوزارا تۇسىنىستىك پەن ۇيلەسىم ەكەنىن اتاپ ءوتتى.
"پاسحا مەيرامى ۇيلەرىڭىزگە ماحاببات پەن شاتتىق سىيلاسىن! بارشا ازاماتتارعا زور دەنساۋلىق، اماندىق جانە شىعارماشىلىق تابىستار تىلەيمىن!", – دەدى مەملەكەت باسشىسى.
