قازاقستان پرەزيدەنتى قاسىم-جومارت توقاەۆ رەسەي فەدەراتسياسى ەنەرگەتيكا ءمينيسترى سەرگەي تسيۆيلەۆتى قابىلدادى. بۇل كەزدەسۋ ەكى ەل باسشىلارىنىڭ كەلىسىمى نەگىزىندە ءوتتى، دەپ حابارلايدى "ادىرنا" ۇلتتىق پورتالى اقوردا ءباسپاسوز قىزمەتىنە سىلتەپ.
كەزدەسۋ بارىسىندا مينيستر تسيۆيلەۆ رەسەي پرەزيدەنتى ۆلاديمير ءپۋتيننىڭ قاسىم-جومارت توقاەۆقا جولداعان جەكە حاتىن تابىس ەتتى.
مەملەكەت باسشىسى مەن مينيستر ەنەرگەتيكا سالاسىنداعى ارىپتەستىكتىڭ بولاشاعىن تالقىلادى. بۇل سالا – قازاقستان مەن رەسەي اراسىنداعى ىنتىماقتاستىقتىڭ نەگىزگى باعىتتارىنىڭ ءبىرى بولىپ سانالادى.
"تاراپتار ەكىجاقتى ەنەرگەتيكالىق جوبالاردى دامىتۋ جانە ستراتەگيالىق سەرىكتەستىكتى تەرەڭدەتۋ جولدارىن قاراستىردى", – دەلىنگەن اقوردا تاراتقان اقپاراتتا.
ەسكە سالا كەتەيىك، بۇعان دەيىن، 17 ساۋىردە، قاسىم-جومارت توقاەۆ پەن ۆلاديمير ءپۋتيننىڭ تەلەفون ارقىلى سويلەسكەنى حابارلانعان ەدى. اڭگىمە بارىسىندا مەملەكەت باسشىلارى قازاق-رەسەي قارىم-قاتىناسىنىڭ قارقىندى دامۋىن اتاپ ءوتىپ، بۇعان دەيىنگى جوعارى دەڭگەيدە جاسالعان كەلىسىمدەردىڭ جۇزەگە اسىرىلۋ بارىسىن تالقىلاعان بولاتىن.
