ديپلومات، قوعام جانە مەملەكەت قايراتكەرى تايىر مانسۇروۆقا «ءنازىر تورەقۇلوۆ» مونوگرافياسى ءۇشىن رەسەيدىڭ 2024 جىل قورتىندىسى بويىنشا «مادەني يمپەريۋم. كىتاپتار مەن جوبالار» (كۋلتۋرنىي يمپەريۋم. كنيگي ي پروەكتى) ۇلتتىق سىيلىعى تابىستالدى، دەپ حابارلايدى “ادىرنا” ۇلتتىق پورتالى.
بۇل ەڭبەك ماسكەۋدە «مولودايا گۆارديا» باسپاسىنان اتاقتى «ونەگەلى ءومىر» (جيزن زامەچاتەلنىح ليۋدەي) سەرياسىمەن جارىق كورگەن جانە بىرنەشە شەتەل تىلىنە اۋدارىلعان. سىيلىقتى جازۋشى، تاريحشى، ساراپتامالىق كەڭەس توراعاسى سۆياتوسلاۆ رىباس تابىستادى.
ءنازىر تورەقۇلوۆ — ديپلومات، ءتىلتانۋشى عالىم، قوعام جانە مەملەكەت قايراتكەرى، 1930–1935 جىلدارى كسرو-نىڭ ساۋد ارابياسى كورولدىگىندەگى توتەنشە جانە وكىلەتتى ەلشىسى بولعان.
ءنازىر تورەقۇلوۆتىڭ مۇراعاتى تولىق كولەمدە 1997–1998 جىلدارى ەۆگەني پريماكوۆتىڭ قولداۋىمەن (ول 1994–2001 جج. رەسەي فەدەراتسياسىنىڭ سىرتقى ىستەر ءمينيسترى بولعان) الىنعان.
بۇل ءىستى جۇزەگە اسىرعان — 1994–2001 جىلدارى قازاقستاننىڭ رەسەيدەگى توتەنشە جانە وكىلەتتى ەلشىسى بولعان، ەكونوميكا جانە ساياسات عىلىمدارىنىڭ دوكتورى تايىر مانسۇروۆ.
تورەقۇلوۆقا قاتىستى قۇجاتتار رەسەيدىڭ سىرتقى ساياسات مۇراعاتىنان، رەسەي مەملەكەتتىك الەۋمەتتىك-ساياسي تاريح مۇراعاتىنان، رەسەي مەملەكەتتىك مۇراعاتىنان جانە رەسەي فسب ورتالىق مۇراعاتىنان الىنعان. مۇراعاتتىق ماتەريالداردى تايىر مانسۇروۆ تەرەڭ زەرتتەپ، ءنازىر تورەقۇلوۆ تۋرالى ورىس، قازاق، اعىلشىن جانە اراب تىلدەرىندە 9 كىتاپ شىعارعان.
