رەسەي فەدەرالدىق قاۋىپسىزدىك قىزمەتى (فقق) "ماسكەۋدەگى سيناگوگاعا جاسالماق شابۋىلدىڭ الدىن الدىق" دەگەن جەلەۋمەن بولعان ىقتيمال اتىستا قازاقستاننىڭ ەكى ازاماتى قازا تاپقانىن جاريالادى، دەپ حابارلايدى "ادىرنا" ۇلتتىق پورتالى رەسەيلىك باق-قا سىلتەمە جاساپ.
رەسەيدىڭ ارنايى قىزمەتتى لاڭكەستىك ارەكەتتىڭ الدىن الدىق دەيدى. فقق مالىمەتىنشە، «ۆيلايات حوراسان» توبىنىڭ (يسلام مەملەكەتىنىڭ اۋعانستاندىق تارماعى بولۋى مۇمكىن) مۇشەلەرى ماسكەۋدەگى سيناگوگاعا قارۋلى شابۋىل جاساماق بولعان، دەپ جازادى ASTRA Telegram ارناسى. مالىمەتكە قاراعاندا ولار كالۋگا وبلىسىنداعى جەكە ۇيلەردىڭ بىرىنەن تابىلدى. تۇتقىنداۋ كەزىندە كۇدىكتىلەر قارسىلىق كورسەتكەنى جانە وقيعا قانتوگىسپەن اياقتالعانى ايتىلدى.
7 ناۋرىز كۇنى تاڭەرتەڭ كورياكوۆو اۋىلىندا فقق مەن كۇدىكتى يسلامشىلار اراسىندا اتىس بولدى، دەپ حابارلايدى ASTRA اقپارات كوزدەرى. ناتيجەسىندە "لاڭكەستىك ارەكەتكە دايىندالدى" دەگەن ەكى كۇدىكتى – قازاقستان ازاماتتارى، 35 جاستاعى ءسابيت اشىراليەۆ پەن 32 جاستاعى جانىبەك تاسقۇلاەۆ قازا تاپتى. قاۋىپسىزدىك قىزمەتكەرلەرىنىڭ ايتۋىنشا، ولار رەسەيگە اعىمداعى جىلدىڭ 28 اقپانىندا كەلگەن.
جەكە ۇيگە جاسالعان رەيدتەن كەيىن قاۋىپسىزدىك كۇشتەرى ماكاروۆ تاپانشاسىن، كالاشنيكوۆ اۆتوماتىن جانە جارىلعىش قۇرىلعىلاردى جاساۋعا ارنالعان دايىندامالاردى تاركىلەدى.
ارنايى قىزمەت تاراتقان ۆيدەودا اتىس كەزى تۇسىرىلمەگەن. تەك كالاشنيكوۆ اۆتوماتتارى مەن ونىڭ قاسىندا جاتقان مايىتتەردىڭ بەينەسى تارادى.
وقيعانىڭ شىن-وتىرىگى تاۋەلسىز اقپارات كوزدەرى ارقىلى راستالعان جوق. سوندىقتان ونىڭ رەسەي ارنايى قىزمەتى حابارلاعانداي سيپاتتا ورىستەگەنىنە ازىرگە دالەل جوق.
ايتا كەتەيىك، يسلام مەملەكەتىنىڭ "ۆيلايات حوراسان» (يگيل-ك) بولىمشەسى — اۋعانستان مەن پاكىستاندا ارەكەت ەتەتىن اۋعاندىق لاڭكەستىك توپ. 2016 جىلى شىلدەدە اتالمىش توپتىڭ سالدارىنان 80 ادام، سول جىلدىڭ تامىز ايىندا 94 ادام قازا تاۋىپ، 2020 جىلدىڭ مامىر ايىندا كابۋل پەرزەنتحاناسىنا جاسالعان شابۋىل كەزىندە 24 ادامنىڭ (ىشىندە جاڭا تۋعان نارەستەلەر مەن انالار دا بار) ءومىرىن قيدى.
