اقش-تىڭ تاللاحاسسي قالاسىنداعى فلوريدا شتاتى ۋنيۆەرسيتەتى كامپۋسىنا بەيمالىم ادامدار وق جاۋدىرعان. قارۋلى شابۋىلدىڭ سالدارىنان ءتورت ادام جاراقات العان. بۇل تۋرالى انادولى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، اتىس اشقان ادام ءالى دە كامپۋس اۋماعىندا جۇرگەنى حابارلاندى.
وقيعا تاللاحاسسي قالاسىنداعى ۋنيۆەرسيتەت كامپۋسىندا جەرگىلىكتى ۋاقىتپەن شامامەن 12:00–دە بولعان. پوليتسيا وقيعا ورنىنا كەلىپ، شابۋىلداۋشىنى زالالسىزداندىرۋ شارالارىن قولعا العان.
Tallahassee Memorial اۋرۋحاناسى جاراقات العان ادامداردىڭ ءالى دە اۋرۋحاناعا جەتكىزىلىپ جاتقانىن راستادى. مەديتسينالىق بريگادالار جەدەل قىزمەتتەر جانە قوعامدىق قاۋىپسىزدىك قىزمەتكەرلەرىمەن بىرلەسىپ وقيعا ورنىندا جۇمىس ىستەپ جاتىر.
ۋنيۆەرسيتەتتىڭ قاۋىپسىزدىك قىزمەتى كامپۋس اۋماعىندا جۇرگەن ادامدارعا شۇعىل ەسكەرتۋ جاريالاپ، قاۋىپسىز جەرلەرگە جاسىرىنۋدى جانە ءارى قارايعى نۇسقاۋلاردى كۇتۋدى سۇرادى.
“بارلىق ەسىك-تەرەزەلەردى جابىڭىزدار، قوسىمشا قاۋىپسىزدىك شارالارىنا دايىن بولىڭىزدار”، — دەلىنگەن حابارلامادا.
ۋنيۆەرسيتەتتەگى بارلىق ساباق ۋاقىتشا توقتاتىلدى. كۋاگەرلەردىڭ ايتۋىنشا، قارۋلى شابۋىل جاساعان ادام ستۋدەنتتەرمەن قاتارلاس ادام بولۋى مۇمكىن. ولاردىڭ سوزىنشە، پوليتسيا وقيعا ورنىنداعى قاۋىپسىزدىك شارالارىن كۇشەيتىپ، شابۋىلداۋشىنى ۇستاۋ نەمەسە زالالسىزداندىرۋ بويىنشا ارەكەت ەتىپ جاتىر.
