اقش پەن باتىس ەۋروپا ەلدەرىنىڭ اسكەري شەنەۋنىكتەرى ۋكراينا الداعى اپتادا رەسەيلىك باسقىنشىلاردى حەرسون وبلىسىنان ازات ەتەتىن ايتتى. بۇل تۋرالى Financial Times جاريالادى، دەپ حابارلايدى “ادىرنا” ۇلتتىق پورتالى.
“ۋكراينا كۇشتەرى رەسەيدىڭ حەرسون وبلىسىنداعى مايدان شەبىن قازان ايىنىڭ باسىندا بۇزىپ-جارىپ ءوتتى. سول كەزدە ونى رەسەي قورعانىس ءمينيسترى مويىندادى. بۇل ۋكراينانىڭ اقپان ايىندا رف قارۋلى كۇشتەرىنىڭ باسىپ كىرگەلى ۋاقىتتان بەرگى وڭتۇستىكتەگى ءبىرىنشى مارتە ىلگەرى جىلجۋى بولدى. سول مەرزىمنەن بەرى ۋكراينا دنەپردىڭ باتىسىنداعى تەرريتوريانىڭ ايتارلىقتاي بولىگىن قايتارىپ الدى”، – دەلىنگەن حابارلامادا.
ەگەر ۋكراين جاۋىنگەرلەرىنىڭ قارقىندى شابۋىلدارى جالعاسا بەرسە، باتىس اسكەريلەرىنىڭ بولجامى بويىنشا، ۋكراينا الداعى اپتادا حەرسوننان دنەپرگە دەيىنگى ارالىقتى قايتارىپ الا الادى.
سونداي-اق، ۋكراينا قارۋلى كۇشتەرىنىڭ «وڭتۇستىك» جەدەل كوماندوۆانيەسى حەرسون وبلىسىنىڭ تاعى بەس ەلدى مەكەنىنىڭ رەسەي باسقىنشىلارىنان ازات ەتىلگەنىن، رەسەيلىك باقىلاۋ بەكەتى مەن كوماندالىق-باقىلاۋ ورتالىعىنىڭ جانە ەكى بۋكسيرلى گاۋبيتساسىنىڭ جويىلعانىن مالىمدەدى.
ايتا كەتەيىك، ۋكراينا سوعىس باستالعالى بەرى رەسەيدەن 1 620 ەلدى مەكەندى ازات ەتتى. سونىڭ ىشىندە حەرسون وڭىرىندە 72 اۋىل-ايماق قايتارىلدى.
