ۋكراينا مەن اقش اراسىنداعى پايدالى قازبالار جونىندەگى كەلىسىم اياسىندا مەموراندۋمعا قول قويىلدى. بۇل تۋرالى ۋكراينا ءبىرىنشى ۆيتسە-پرەمەرى — ەكونوميكا ءمينيسترى يۋليا سۆيريدەنكو مالىمدەدى, دەپ حابارلايدى “ادىرنا” ۇلتتىق پورتالى.
”بۇگىن ءبىز اقش-پەن ەكونوميكالىق سەرىكتەستىك جونىندەگى كەلىسىمگە ءبىر قادام جاقىندادىق. ۋكراينا مەن امەريكا قۇراما شتاتتارى مەموراندۋمعا قول قويدى. بۇل — ءبىزدىڭ توپتاردىڭ كونسترۋكتيۆتى بىرلەسكەن جۇمىسىنىڭ دالەلى جانە ەكى حالىققا دا ءتيىمدى بولاتىن كەلىسىمگە قول جەتكىزۋگە دەگەن ۇمتىلىس”، — دەپ جازدى ول ءوزىنىڭ Facebook پاراقشاسىندا.
يۋليا سۆيريدەنكونىڭ ايتۋىنشا، ۋكراينادا قالپىنا كەلتىرۋ جۇمىستارىنا باعىتتالعان ينۆەستيتسيالىق قور قۇرۋ جوسپارلانىپ وتىر.
“اتالعان كەلىسىم ءىرى ينۆەستيتسيالار تارتۋعا، ينفراقۇرىلىمدى جاڭعىرتۋعا جانە ۋكراينا مەن اقش اراسىنداعى ءوزارا ءتيىمدى سەرىكتەستىكتى نىعايتۋعا مۇمكىندىك بەرەدى. سول سەبەپتى قۇجاتتى ازىرلەۋ جۇمىستارى جالعاسىپ جاتىر”، — دەدى ول.
ونىڭ ايتۋىنشا، كەلىسىم ءماتىنىن ناقتىلاۋ جانە وعان قول قويۋ الدا تۇر. ودان كەيىن قۇجاتتى ەكى ەل پارلامەنتتەرى راتيفيكاتسيالاۋى قاجەت.
اقش پەن ۋكراينا اراسىنداعى پايدالى قازبالار تۋرالى كەلىسىمگە ءدال ءبىر اپتادان كەيىن، 24 ساۋىردە قول قويىلادى — بۇل تۋرالى بەيسەنبى كۇنى اقش پرەزيدەنتى دونالد ترامپ مالىمدەدى، دەپ حابارلايدى BBC.
ەسكە سالا كەتەيىك، 24 ناۋرىزدا اقش پرەزيدەنتى دونالد ترامپ امەريكا اكىمشىلىگى مەن ۋكراينا بيلىگى سيرەك كەزدەسەتىن جەر ەلەمەنتتەرى بويىنشا كەلىسىم جوباسىن اياقتاپ قالعانىن جانە وعان جاقىن ارادا قول قويىلاتىنىن مالىمدەگەن بولاتىن. كيەۆ ءوز كەزەگىندە اقش-تىڭ اەس-تەرگە باقىلاۋ جۇرگىزۋ تالابىنسىز كەلىسىمگە قول قويۋعا دايىن ەكەنىن حابارلادى. ال 12 ساۋىردە ۋكراينا مەن اقش مينەرالدار جونىندەگى كەلىسىم بويىنشا ۆاشينگتوندا كەلىسسوزدەر وتكىزگەنى بەلگىلى بولدى.
