Ukraina men AQŞ arasyndaǧy paidaly qazbalar jönındegı kelısım aiasynda memorandumǧa qol qoiyldy. Būl turaly Ukraina bırınşı vise-premerı — ekonomika ministrı Iýliia Sviridenko mälımdedı, dep habarlaidy “Adyrna” ūlttyq portaly.
”Bügın bız AQŞ-pen ekonomikalyq serıktestık jönındegı kelısımge bır qadam jaqyndadyq. Ukraina men Amerika Qūrama Ştattary memorandumǧa qol qoidy. Būl — bızdıŋ toptardyŋ konstruktivtı bırlesken jūmysynyŋ dälelı jäne ekı halyqqa da tiımdı bolatyn kelısımge qol jetkızuge degen ūmtylys”, — dep jazdy ol özınıŋ Facebook paraqşasynda.
Iýliia Sviridenkonyŋ aituynşa, Ukrainada qalpyna keltıru jūmystaryna baǧyttalǧan İnvestisiialyq qor qūru josparlanyp otyr.
“Atalǧan kelısım ırı investisiialar tartuǧa, infraqūrylymdy jaŋǧyrtuǧa jäne Ukraina men AQŞ arasyndaǧy özara tiımdı serıktestıktı nyǧaituǧa mümkındık beredı. Sol sebeptı qūjatty äzırleu jūmystary jalǧasyp jatyr”, — dedı ol.
Onyŋ aituynşa, kelısım mätının naqtylau jäne oǧan qol qoiu alda tūr. Odan keiın qūjatty ekı el parlamentterı ratifikasiialauy qajet.
AQŞ pen Ukraina arasyndaǧy paidaly qazbalar turaly kelısımge däl bır aptadan keiın, 24 säuırde qol qoiylady — būl turaly beisenbı künı AQŞ prezidentı Donald Tramp mälımdedı, dep habarlaidy BBC.
Eske sala keteiık, 24 nauryzda AQŞ prezidentı Donald Tramp Amerika äkımşılıgı men Ukraina bilıgı sirek kezdesetın jer elementterı boiynşa kelısım jobasyn aiaqtap qalǧanyn jäne oǧan jaqyn arada qol qoiylatynyn mälımdegen bolatyn. Kiev öz kezegınde AQŞ-tyŋ AES-terge baqylau jürgızu talabynsyz kelısımge qol qoiuǧa daiyn ekenın habarlady. Al 12 säuırde Ukraina men AQŞ mineraldar jönındegı kelısım boiynşa Vaşingtonda kelıssözder ötkızgenı belgılı boldy.
