سارسەنبى كۇنى كەشكى ۋاقىتتا امەريكالىق اسكەري اۋە كۇشتەرى يەمەن استاناسى سانا مەن ءال-دجاۋف پروۆينتسياسىنا 12-دەن استام اۋە سوققىسىن جاسادى، دەپ حابارلايدى "ادىرنا" ۇلتتىق پورتالى Middle East Monitor باسىلىمىنا سىلتەمە جاساپ.
اۋە شابۋىلىنان ساناداعى اس-سابين اۋدانىنا قاراستى ءال-حافا ايماعى جانە ءال-دجاۋف پروۆينتسياسىنداعى ءال-حازم قالاسى قاتتى زارداپ شەكتى. دەگەنمەن، قازىرگى ۋاقىتتا بۇل شابۋىلداردان قازا تاپقاندار مەن جارالانعاندار تۋرالى ناقتى اقپارات جوق.
حۋسيتتەر قوزعالىسىنىڭ مالىمەتىنە سايكەس، 15 ناۋرىزدان بەرى اقش جۇرگىزگەن اۋە شابۋىلدارى سالدارىنان كەمىندە 124 بەيبىت تۇرعىن قازا تاۋىپ، 256 ادام جاراقات العان. جارالانعانداردىڭ باسىم بولىگى — ايەلدەر مەن بالالار. اقش پرەزيدەنتى دونالد ترامپ وتكەن ايدا يەمەندەگى حۋسيتتەرگە قارسى "شەشۋشى جانە كۇشتى اسكەري ارەكەتكە" بۇيرىق بەرگەنىن مالىمدەگەن. ول سونداي-اق حۋسيتتەردى "تولىعىمەن جويامىز" دەپ قورقىتقان بولاتىن.
بۇل شابۋىلداردىڭ ارتىندا گازا سەكتورىنداعى احۋالمەن بايلانىستى گەوساياسي جاعداي جاتىر. 2023 جىلدىڭ قاراشا ايىنان بەرى حۋسيتتەر ءيزرايلدىڭ گازا سەكتورىنداعى اسكەري ارەكەتتەرىنە جاۋاپ رەتىندە قىزىل جانە اراب تەڭىزدەرىندە، باب-ەل-ماندەب بۇعازى مەن ادەن شىعاناعى ارقىلى وتەتىن حالىقارالىق ساۋدا كەمەلەرىنە شابۋىل جاساپ كەلەدى.
يزرايل مەن پالەستينالىق حاماس قوزعالىسى اراسىندا قاڭتار ايىندا ۋاقىتشا اتىستى توقتاتۋ تۋرالى كەلىسىمگە قول جەتكىزىلگەن بولاتىن. الايدا ءيزرايلدىڭ وتكەن ايدا گازاعا قايتادان اۋە شابۋىلدارىن باستاۋى حۋسيتتەردىڭ ارەكەتتەرىن جالعاستىرۋىنا سەبەپ بولدى.