Sársenbi kúni keshki ýaqytta amerıkalyq áskerı áýe kúshteri Iemen astanasy Sana men ál-Djaýf provınııasyna 12-den astam áýe soqqysyn jasady, dep habarlaıdy "Adyrna" ulttyq portaly Middle East Monitor basylymyna silteme jasap.
Áýe shabýylynan Sanadaǵy As-Sabın aýdanyna qarasty ál-Hafa aımaǵy jáne ál-Djaýf provınııasyndaǵy ál-Hazm qalasy qatty zardap shekti. Degenmen, qazirgi ýaqytta bul shabýyldardan qaza tapqandar men jaralanǵandar týraly naqty aqparat joq.
Hýsıtter qozǵalysynyń málimetine sáıkes, 15 naýryzdan beri AQSh júrgizgen áýe shabýyldary saldarynan keminde 124 beıbit turǵyn qaza taýyp, 256 adam jaraqat alǵan. Jaralanǵandardyń basym bóligi — áıelder men balalar. AQSh prezıdenti Donald Tramp ótken aıda Iemendegi hýsıtterge qarsy "sheshýshi jáne kúshti áskerı áreketke" buıryq bergenin málimdegen. Ol sondaı-aq hýsıtterdi "tolyǵymen joıamyz" dep qorqytqan bolatyn.
Bul shabýyldardyń artynda Gaza sektoryndaǵy ahýalmen baılanysty geosaıası jaǵdaı jatyr. 2023 jyldyń qarasha aıynan beri hýsıtter Izraıldiń Gaza sektoryndaǵy áskerı áreketterine jaýap retinde Qyzyl jáne Arab teńizderinde, Bab-el-Mandeb buǵazy men Aden shyǵanaǵy arqyly ótetin halyqaralyq saýda kemelerine shabýyl jasap keledi.
Izraıl men palestınalyq HAMAS qozǵalysy arasynda qańtar aıynda ýaqytsha atysty toqtatý týraly kelisimge qol jetkizilgen bolatyn. Alaıda Izraıldiń ótken aıda Gazaǵa qaıtadan áýe shabýyldaryn bastaýy hýsıtterdiń áreketterin jalǵastyrýyna sebep boldy.
