استانا قالاسىنىڭ اكىمى جەڭىس قاسىمبەك LRT جوباسىنا قاتىستى جولاقى قۇنىنا بايلانىستى سۇراققا جاۋاپ بەردى، دەپ حابارلايدى “ادىرنا” ۇلتتىق پورتالى.
سارايشىك اۋدانىندا وتكەن ەسەپتىك كەزدەسۋدە قالا باسشىسى LRT-عا جولاقى ناقتى بەكىتىلمەگەنىن ايتتى.
“جوبالىق ەسەپ بويىنشا جولاقى 100-دەن 200 تەڭگەگە دەيىن بولادى دەپ جوسپارلانعان. ازىرگە وسى دياپازوندا ساقتالىپ وتىر”، – دەدى جەڭىس قاسىمبەك.
بۇعان دەيىن اكىم LRT قۇرىلىس جۇمىستارى 2025 جىلدىڭ جازىندا تولىق اياقتالاتىنىن مالىمدەگەن بولاتىن.
كەزدەسۋ بارىسىندا تۇرعىندار اۋلا اۋماقتارىن اباتتاندىرۋ، قوعامدىق كەڭىستىكتەردى دامىتۋ، كوشە جارىعى، كوگالداندىرۋ، قوعامدىق كولىكتىڭ قولجەتىمدىلىگى جانە الەۋمەتتىك ينفراقۇرىلىمدى جەتىلدىرۋ ماسەلەلەرىن دە كوتەردى.
ايتا كەتەيىك، LRT جوباسى اياسىندا كابانباي باتىر داڭعىلى بويىندا ورنالاسقان حالىقارالىق اۋەجاي ماڭىنداعى ستانتسيانىڭ ىشكى كورىنىسى كورسەتىلدى. وندا ەسكالاتورلار، ينتەراكتيۆتى ەكراندار مەن جارىق مول تۇسەتىن ۇلكەن تەرەزەلەر قاراستىرىلعان. سونداي-اق جولاۋشىلارعا ارنالعان ليفتەر ورناتىلعان.
