اقش پرەزيدەنتى دونالد ترامپ رەسەي تۋى استىندا جۇزەتىن نەمەسە رەسەيمەن بايلانىسى بار كەمەلەرگە امەريكاندىق پورتتارعا كىرۋگە سالىنعان تىيىمدى تاعى ءبىر جىلعا ۇزارتتى. بۇل تۋرالى 16 ءساۋىر كۇنى اقش-تىڭ فەدەرالدى رەەسترىندە جاريالانعان جارلىقتا ايتىلعان، دەپ حابارلايدى “ادىرنا” ۇلتتىق پورتالى DW-عا سىلتەپ.
اتالعان شەكتەۋ العاش رەت 2022 جىلدىڭ ساۋىرىندە اقش-تىڭ ەكس-پرەزيدەنتى دجو بايدەننىڭ باستاماسىمەن ەنگىزىلگەن بولاتىن. ول كەزدە بايدەن بۇل شەشىم “رەسەيدى حالىقارالىق ەكونوميكالىق جۇيەنىڭ ارتىقشىلىقتارىنان ايىرۋ ماقساتىندا قابىلدانعانىن” مالىمدەگەن ەدى.
دونالد ترامپ قول قويعان جاڭا جارلىقتا رەسەي ۇكىمەتىنىڭ ساياساتى مەن ارەكەتتەرى اقش-تىڭ ۇلتتىق قاۋىپسىزدىگىنە قاۋىپ توندىرەدى دەپ كورسەتىلگەن.
سانكتسيالار رەسەي ەكونوميكاسىنا ايتارلىقتاي سوققى تيگىزىپ وتىر. The Moscow Times باسىلىمىنىڭ 5 ناۋرىزداعى دەرەگىنشە، اقش سانكتسيالارى ناتيجەسىندە رەسەي فەدەرالدى بيۋدجەتى مۇناي-گاز كىرىسىنىڭ شامامەن 20%-ىنان ايىرىلعان.
رەسەي قارجى مينيسترلىگىنىڭ مالىمەتىنە سۇيەنسەك، 2025 جىلدىڭ اقپانىندا مۇناي-گاز سالاسىنان تۇسەتىن سالىق كولەمى 771,3 ملرد ءرۋبلدى قۇراپ، بۇل وتكەن جىلمەن سالىستىرعاندا 18%-عا ازايعان. ساراپشىلاردىڭ ايتۋىنشا، رەسەيلىك مۇناي كومپانيالارى حالىقارالىق قىسىمنىڭ كۇشەيۋىنە بايلانىستى ونىمدەرىنە ۇلكەن جەڭىلدىكتەر جاساۋعا ءماجبۇر، بۇل ءوز كەزەگىندە بيۋدجەتتىڭ تابىسىن ازايتقان.
