پروديۋسەر ءارى مۋزىكا سىنشىسى ەۆگەني بابيچەۆ NEWS.ru سايتىنا بەرگەن سۇحباتىندا تانىمال قازاقستاندىق ءانشى ديماش قۇدايبەرگەن ايگىلى رەسەيلىك كومپوزيتور يگور كرۋتويمەن سەرىكتەستىگىن توقتاتقانىن ايتتى، دەپ حابارلايدى "ادىرنا" ءتىلشىسى.
بابيچەۆتىڭ ايتۋىنشا، ديماش باتىس سانكتسياسىنىڭ سالدارىنان ءوز كومانداسىنىڭ مۇشەلەرىن جوعالتقىسى كەلمەگەن جانە بولاشاقتا كرۋتويمەن ىنتىماقتاستىقتى قالپىنا كەلتىرۋى مۇمكىن ەكەنىن دە ايتتى.
«قازىر ءۇزىلىس بولعانى تۇسىنىكتى. ديماشتا ەلدەردىڭ ءارتۇرلى ايماقتارىنان، سونىڭ ىشىندە باتىستان ۇلكەن كوماندا بار. بالكىم، ديماش سانكتسيا سالدارىنان كومانداسىنان بىرەۋدى جوعالتقىسى كەلمەدى. ول وسىنداي شەشىم قابىلدادى. مەنىڭ ويىمشا، ولار رەسەيلىك سەرىكتەستەرىمەن تىنىش جانە بەيبىت تۇردە تارقاستى. بۇل تەك شىعارماشىلىق ءۇزىلىس بولدى»، - دەدى بابيچەۆ.
بۇل رەتتە مۋزىكا سىنشىسى ديماش قۇدايبەرگەننىڭ رەسەيگە قايتا ورالاتىنىنا سەنىم ءبىلدىردى. ول رەسەي فەدەراتسياسىندا ءانشىنىڭ كوپتەگەن جانكۇيەرلەرى جانە جاس ونەرپازدى ۇنەمى قولدايتىن بەلسەندى جانكۇيەرلەرى بار ەكەنىن اتاپ ءوتتى.
